मनोनयन दर्ता सम्पन्न,छानिने भए ३३४ जनप्रतिनिधी
काठमाडौँ / ३५ जिल्लाका ३ सय ३४ स्थानीय तहमा हुन लागेको दोस्रो चरणको निर्वाचनको मनोनयन प्रक्रिया सम्पन्न भएको छ। आज बिहान ८ बजेदेखि सुरु भएको मनोनयन प्रक्रियामा कपिलवस्तुको बाडगंगा नगरपालिकामा बाहेक सबै जिल्लाका स्थानीय तहमा शान्तिपूर्ण वातावरणमा सम्पन्न भएको निर्वाचन आयोगले जानेको छ।
देशभरीका ७ सय ४४ तहमध्ये पहिलो चरणमा ३४ जिल्लाका २ सय ८३ तहको निर्वाचन वैशाख ३१ गते सम्पन्न भई चितवनको भरतपुर महानगरपालिका बाहेक सबै तहको परिणाम सार्वजनिक भइसकेको छ। प्रदेश नम्बर १, ५ र ७ मा पर्ने एक महानगरपालिका, सात उपमहानगरपालिका, एक सय ११ नगरपालिका र २ सय १५ गाउँपालिकामा असार १४ गते हुने दोस्रो चरणको निर्वाचनमा विभिन्न राजनीतिक दल र स्वतन्त्र उम्मेदवारले आफ्ना कार्याकर्ता र समर्थकसहित उत्सवकै रुपमा मनोनयन दर्ता गरेका छन्।
दोस्रो चरणमा बाँकी प्रदेशका स्थानीय तहमा असार १४ गते निर्वाचनको मिति तय भएपनि तराई मधेस केन्द्रीत राष्ट्रिय जनता पार्टीले चर्को विरोध जनाएपछि प्रमुख दलबीच भएको सहमतिका आधारमा सरकारले प्रदेश नम्बर २ का ८ जिल्लामा पर्ने स्थानीय तह निर्वाचन असोज २ गते तेस्रो चरणमा गर्ने निर्णय गरेको थियो।
