को-को कहाँ खटिदैछन् एमाले नेता
काठमाडौँ । पहिलो चरणको स्थानीय निर्वाचनमा नेकपा एमाले पहिलो पार्टी भएपछि दोस्रो चरणको स्थानीय निर्वाचनमा पनि पहिलो पार्टी बन्न नेकपा एमाले जोडतोडले लागेको छ । चुनावी प्रचारको अभियानमा नेकपा एमालेका प्रमुख नेताहरु मैदानमा उत्रिएका छन् ।
यसैगरी नेकपा एमालेका अध्यक्ष केपी शर्मा ओली केही दिनअघि प्रदेश नम्वर ५ मा पुगेर विशाल सभा गरे । नेपालगन्ज र दाङ पुगेका ओलीले मैदानमा खटेर लाग्न नेता कार्यकर्तालाई निर्देशन दिए । एमालेका दुई उपमहासचिव प्रदेश नम्वर ५ मा कम्मर कसेर लागेका छन् । बुटवल उपमहानगरपालिकामा कांग्रेस र माओवादीको चुनावी तालमेल भएपछि उपमहासचिव विष्णु पौडेल र घनश्याम भूषाल बुटवलमा खटिएका छन् ।
त्यसैगरी पाटीका सचिव प्रदीप ज्ञवाली र गोकर्ण बिष्टले गुल्मी, पाल्पा र अर्खाखाँचीमा कम्मर कसेका छन् । उनीहरुले एमालेलाई जिताउन दिनभर घरदैलो र साँझ योजना बनाउने गरेका छन् ।
सवैभन्दा बढि चुनौति र प्रतिष्ठाको स्थान दाङ र बाँके एमाले स्थायी कमिटी सदस्य शंकर पोखरेल विगत १० दिनदेखि मोर्चा कसेर बसेका छन् । दुई उपमहानगरपालिकामा सफलता पाउने नेता पोखरेलले बताए । ‘पहिलेको भन्दा अहिले दाङ एमालेका लागि निकै राम्रो भएको छ, धेरै स्थानमा एमालेले जित्छ’ पोखरेलले भने ।
बाँके र बर्दियामा एमाले उपाध्यक्ष बामदेव गौतम अबको केही दिनमा जाँदैछन् । उनी एकसाता बाँके र बर्दियामै बस्ने योजना रहेको छ । बाँके र बर्दियामा जिताउने जिम्मा पार्टीले उनलाई दिएको छ ।
प्यूठानमा एमाले प्रचारबिभागका उप संयोजक सूर्य थापा कम्मर कसेर लागेका छन् । थापा नेपालगन्ज, दाङ हुदै प्यूठान पुगेका छन् ।
त्यसैगरी प्रदेश नम्वर ७ मा एमाले नेता भीम रावल पुगिसकेका छन् । सात नम्वर प्रदेशमा सवै जिल्लामा पुग्ने उनको योजना रहेको छ । रावलसँगै एमालेका सवै केन्द्रीय नेताहरु सात नम्वर प्रदेशमा पुगिसकेका छन् ।
प्रदेश नम्वर एकमा एमाले सचिव योगेश भट्टराई पुगेर राजधानी फर्केका छन् । ताप्लेजुङ, पाँचथर, इलाम र झापा पुगेका भट्टराईले चुनावी रणनीतिका बारेमा स्थानीय नेता कार्यकर्तासँग छलफल पनि गरेका थिए । प्रदेश नम्वर एकमा केही दिनका लागि एमाले अध्यक्ष केपी शर्मा ओली र वरिष्ठ नेता झलनाथ खनाल पनि पुग्ने भएका छन् ।
