डीआईजी बढुवामा चलखेल

काठमाडौँ । सशस्त्र प्रहरी बलभित्र समयमा बढुवा नहुँदा एसपी कुलबहादुर नेम्बाङ २०७४ असार २६ गते पेन्सन समेत नपाउने गरी अवकाश हुने भएका छन् । एसपीद्धय नेम्बाङ र राजेन्द्र अधिकारी २०७४ असार २६ गते १० वर्षे पदावधीका आधारमा अवकाश हुँदैछन् । अधिकारीको पेन्सन भैसकेको छ तर नेम्बाङ बढुवा नभए पेन्सन समेत नपाउने गरी अवकाश हुनेछन् ।

नवनियुक्त गृहमन्त्री जनार्दन शर्मा २०७४ जेठ २५ गते सशस्त्र प्रहरी बलको निरीक्षणमा गएका बेला आईजीपी सिंहबहादुर श्रेष्ठ सहितका उच्च अधिकारीले बढुवा प्रकृया सुरु गर्नुपर्ने कुरा जानकारी गराएका थिए । पेन्सन नै नपाई अवकाश हुन लागेकाले गृहमन्त्री शर्माले प्रकृया तत्काल शुरु गर्न निर्देशन दिएपछि सशस्त्रले रिक्त ५ डिआईजीमा बढुवाका लागि सूचना निकालेको छ । जसअनुसार आवेदन भर्ने म्याद २०७४ जेठ २८ गते मा सकिएको छ । सशस्त्र डिआईजीको बढुवामा योग्यताको बारेमा पनि कुरा उठेका छ ।

अहिले यहि विषयलाई लिएर बढुवामा चलखेल शुरु भएको बताईन्छ । यसका लागि एसएसपी संजय राणा र भरत श्रेष्ठले जेठ २४ गते गृहमन्त्री शर्मालाई भेटी पूर्व आईजीपी कोषराज वन्तले प्राविधिकहरुलाई मात्र बढुवा गर्ने गरेको गुनासो गरेका छन् । उनीहरुले विगतमा एसएलसी पास नभएका बलरामबहादुर केसी डिआईजी भैसकेको उदाहरण समेत प्रस्तुत गरेका छन् । अहिले आईए पास भएकाहरुलाई बढुवा गर्नको लागि राणा र श्रेष्ठ लागिरहेका छन् । तर त्यसो गर्नको लागि बढुवाको सूचना रोक्नुपर्ने हुन्छ । त्यो भएको छैन । यसो हुँदा राणा र श्रेष्ठ बढुवाबाट रोकिनेछन् । साँघु साप्ताहिकमा समाचार छ ।