इपिएस कोरिया शाखाको गल्तीले चार सय परीक्षार्थीको परीक्षा छुट्यो
काठमाडौँ । रोजगार अनुमति प्रणाली (इपिएस) आठौँ कोरियन भाषा परीक्षाअन्तर्गत पहिलो दिन भएको परीक्षामा परीक्षा केन्द्रसम्बन्धी विवरण फरक पर्दा एक परीक्षा केन्द्रका चार परीक्षार्थीको परीक्षा छुटेका छन् ।
एसियन इन्स्टिच्युट अफ म्यानेजमेन्ट खुमलटारमा परीक्षा केन्द्रको प्रवेशपत्र नम्बरको विवरण अन्यथा पर्न गएकाले सिनं १००७२८७३ देखि १००७३५५८ सम्मका परीक्षार्थीमध्ये केही परीक्षार्थी परीक्षा दिनबाट वञ्चित भएका छन् । केन्द्रमा ७ सय ५० परीक्षार्थी रहेकामा ४ सयको परीक्षा छुटेको हो ।
वैदेशिक रोजगार विभाग, इपिएस शाखाका अधिकृत शोभाकर भण्डारीले मानवसंशाधन कोरियासँगको सहमतिमा छुटेका परीक्षार्थीलाई यथाशक्य छिटो परीक्षा दिने व्यवस्था मिलाउन आवश्यक पहल भइरहेको जानकारी दिए ।
उनले भने, ‘हामीले जेठ १९ गते परीक्षा केन्द्रको सूचना जारी गर्छौं भनेका थियौँ, तर १८ गते नै वेबसाइटमा राख्यौँ, परीक्षा केन्द्रको विवरण केही फरक परेपछि लगत्तै सच्यायौँ । तर परीक्षार्थीले पुरानै तालिका हेरेर गएछन् ।’
परीक्षामा ७५ हजार ५ सय ८० ले आवेदन दिएकामा शनिबार राजधानीको २६ वटा केन्द्रमा ३७ हजार बढीले भाषा परीक्षामा सहभागी भए । आइतबार पनि परीक्षा दिनेछन् । बिहान र दिउँसो गरी दुई चरणमा परीक्षा भइरहेको छ ।
भाषा परीक्षामा सहभागीमध्ये १० हजार २ सय मात्र उत्तीर्ण हुनेछन् । जसमा कृषि क्षेत्रमा छ हजार २ सय र उत्पादनमा चार हजार उत्तीर्ण हुनेछन् । परीक्षामा नौ हजार ७ सय ९६ महिला र ६५ हजार ७ सय ८४ पुरुषले आवेदन दिएका छन् ।
एकाउन्न हजार २ ुय २ ले कृषिमा र २४ हजार ३ ुय ७८ उत्पादनमा आवेदन दिएका छन् । परीक्षाका लागि कोरियाबाट परीक्षा सञ्चालक ५५ जनाको टोली आएको छ ।
यसैबीच इपिएस परीक्षा दिनका लागि गएका पिनाकल कलेज, लगनखेल सेन्टरबाट तीनजना, लिटिल एञ्जल कलेज सेन्टरबाट एकजना र एसियन कलेज खुमलटार सेन्टरबाट एक–एक गरी पाँच नक्कली परीक्षार्थीलाई प्रहरीले पक्राउ गरेको छ ।
