फराकिलो जितका लागि दोलखामा पार्वतलाई सहज
नेकपा एकीकृत मार्क्सवादी–लेनिनवादी (एमाले) दोलखाका संस्थापक नेता शिवप्रसाद भण्डारी पुनः एमालेमै फर्किएका छन । उनकी श्रीमती कल्पना भण्डारी तथा भीमेश्वर नगरपालिकाकी पूर्व उपमेयर शान्त बस्नेतसहितका कार्यकर्ता पनि सोमबार एमालेमा फर्किएका छन । भण्डारी एमाले दोलखाको दुई कार्यकाल पार्टी प्रमुख, पार्टी केन्द्रिय अनुशासन आयोग सदस्य तथा पुर्व जिविस उपसभापतिसमेत भैसकेका व्यक्तित्व हुन ।
बिहान आयोजित पुनर्मिलन कार्यक्रममार्फत संस्थापक नेता भण्डारीसहितलाई पार्टीमा औपचारिक रूपमा स्वागत गरिएको थियो। कार्यक्रममा एमाले उम्मेदवार तथा पुर्व मन्त्री पार्वत गुरुङ, पार्टी नेता तथा पुर्व मन्त्री आनन्दप्रसाद पोखरेल, केन्द्रीय सदस्यहरु रचना खड्का र श्यामकुमार बस्नेत, पार्टीका सस्थापक नेताद्वय जीतविर लामा र लालकुमार केसीलगायत जिल्लाका अगुवा नेता कार्यकर्ता सहभागी थिए ।
पुनर्मिलन कार्यक्रममा बोल्दै नेता भण्डारीले एमालेको सम्पूर्ण शक्ति एकजुट भएर जनतामाझ जाँदा मात्रै विजयी हासिल गर्न सकिने बताए । उनले दोलखामा पार्टीलाई पहिलो शक्ति बनाउन सबै नेता–कार्यकर्तालाइ समन्वय र सहकार्यसहित सकृय बन्न आह्वान गरे । ‘अब विभाजन र अन्तर्विरोध होइन, एकताको सन्देश लिएर जनताको घरदैलोमा पुग्नुपर्छ,’ उनले भने । उनले आगामी निर्वाचनमा एमाले उम्मेदवार पार्वत गुरुङलाई विजयी गराउन आफू पूर्ण रूपमा प्रतिबद्ध रहेको स्पष्ट पारे । ‘दोलखाको विकास र स्थायित्वका लागि एमालेको जित आवश्यक छ,’ उनको भनाइ थियो। चार वर्षअघि एमाले विभाजनपछि नेता भण्डारी नेकपा (एकीकृत समाजवादी)मा पोलिटब्युरो सदस्यका रुपमा सक्रिय थिए । पार्टी महाधिवेशन हुदा उनी घनश्याम भुषाल प्यानलबाट उपमहासचिवको उम्मेद्वार पनि बनेका थिए ।
एमालेलाई बाइपास गरेर माओवादीसग मात्र मिल्ने अध्यक्ष माधवकुमार नेपालसहित बहुमत पङ्क्तिको निर्णयमा असहमत भण्डारीलाई समर्थन गर्ने दोलखाको बहुसङ्ख्यक हिस्सा एकतामा सामेलै भएको थिएन । एक पालिका प्रमुख, एक उपप्रमुख र वडाध्यक्षसहित जनप्रतिनिधी जितेको तत्कालीन नेकपा एसका अधिकाङ्स नेता- कार्यकर्ता एमालेलाई सघाउने निष्कर्षमा पुगेका छन ।
काठमाडौंस्थित सम्पर्क मंचका पुर्व नेतृत्वहरुले पनि भण्डारीलाई नै साथ दिदै आएका छन । उनको फिर्तिसगै माओवादीसहित मिलेर बनेको नेकपामा सामेल छिटफुट नेता-कार्यकर्ता पनि घर फिर्तिकै निर्णय लिने दिशामा रहेको बताइएको छ । यसले ०४८ देखि नै गढको रुपमा चिनिएको दोलखामा फेरि फराकिलो जितका लागि अनुकुल वारवरण बन्दै गएको एमालेले आन्तरिक विश्लेषण गरेको छ । पछिल्लो समय बदलिएको राजनीतिक परिस्थितिमा पुनः एमालेमै फर्किने निर्णय गरेको कार्यक्रममा भण्डारीले बताए ।
पार्टी नेताहरूले भण्डारीसहित अन्य नेताहरूको पुनरागमनले दोलखामा एमालेको संगठन थप मजबुत बन्ने विश्वास व्यक्त गरेका छन्। पुराना नेताहरूको अनुभव र कार्यकर्तामाझको प्रभावले आगामी चुनावी अभियानमा सकारात्मक ऊर्जा थप्ने पनि अपेक्षा गरिएको छ । केही दिनअघि मात्र तत्कालीन युवा सघ जिल्ला सचिवसहित एक दर्जन युवाको जिल्ला नेतृत्व एमालेमा प्रवेश गरेको थियो । त्यस्तै तत्कालीन नेकपा एसकै उधोग व्यबसायी महासघका उपमहासचिव प्रकाश कटुवालले पनि नेकपा परित्याग गरेका थिए । पार्टी फरक हुदा पनि ०७९ को स्थानीय निर्वाचनदेखी नै कटुवालले एमालेलाई नै सहयोग गर्दै आएका थिए ।
