बागमती प्रदेशमा एमालेले १८ सीट जित्ने कैलाश ढुंगेलको दावी

हाम्रो इकोनोमि

 

 

नेकपा एमालेका बागमती प्रदेश कमिटी अध्यक्ष कैलाश ढुंगेलले फागुन २१ को चुनावमा बागमतीका ३३ मध्ये कम्तीमा १८ सीट जित्ने लक्ष्य सुनिश्चित भएको दावी गरेका छन् । चुनावी अभियानक्रममा उम्मेदवार माधव ढुंगेलसहितको टोली लिएर रामेछापमा घरदैलो गरिरहेका अध्यक्ष ढुंगेलले बागमतीमा ३३ सीटमध्ये १८ सीट जित्ने दावी गरे । उनले थप २ सीटमा कडा प्रतिस्पर्धा रहेकाले २० सीटसम्म पुग्न सक्ने दावी गरे ।

 अध्यक्ष ढुंगेलले भने, हामीले बागमतीका सबै निर्वाचन क्षेत्रको एकसरो आँकलन गरेका छौँ । यसपटक हामीले उपत्यकाभित्रका १५ र अन्य १८ सहित ३३ सीटमध्ये १८ सीट जित्ने आँकलन गरेका छौँ । अरु एक दुई क्षेत्रमा तीब्र प्रतिस्पर्धाबाट हाम्रा उम्मेदवार जित्ने सम्भावना छ । अहिले म रामेछापमा छु र रामेछापमा पनि हामी जित्दैछौँ ।

एमालेले २०७९ को निर्वाचनमा बागमतीका ३३ सीतमध्ये ४ ठाउँमा मात्र जितेको थियो । काठमाडौँ ९ मा कृष्णगोपाल श्रेष्ठ, ललितपुर २ मा प्रेम महर्जन, काभ्रे २ मा गोकुल बास्कोटा र मकवानपुर २ मा महेश बर्तौलाले जितेका थिए । उनीहरुमध्ये यसपटक गोकुलले भने टिकट पाएनन् ।