राजनीति गर्ने हो भने दल खोलेर आउन पूर्वराजालाई ढकालको सुझाव
नेकपा (एमाले) स्थायी कमिटी सदस्य एवं जनसंगठन संयन्त्र प्रमुख भानुभक्त ढकालले पत्रकारले समाजले अनुभूति गर्ने गरी काम गर्नुपर्ने बताएका छन् ।
प्रेस चौतारी नेपाल प्रदेश प्रतिष्ठान समितिको दोस्रो अधिवेशन उद्घाटन कार्यक्रमलाई सम्बोधन गर्दै ढकालले सम्मेलन, अधिवेशन र महाधिवेशनमा पत्रकार देखिने अघिपछि हराउने कुरा अन्त्य हुनुपर्ने बताएका हुन् । पत्रकारले समाजको हरेक क्षेत्रमा प्रभाव पार्ने गरी काम गर्नुपर्नेमा उनले जोड दिए । आन्दोलन सबै मिलेर गर्नुपर्ने बताउँदै उनले यो साझा अभियान भएको स्पष्ट पारे। ‘आन्दोलन सबै मिलेर गर्ने हो, यो साझा अभियान हो’, ढकालले भने ।
अहिले समाजमा एक खालको अस्थिरता र अराजकता मच्चाउने व्यक्ति र शक्ति एक ठाउँमा उभिएका उनले बताएका छन् । समाज एउटा गतिमा अघि बढिसकेपछि फेरि पछाडि फर्कन सक्दैन भन्ने कुरा राजावादीलाई नबिर्सन उनले आग्रह गरे । ‘पूर्वराजा नागरिक भएर राजनीति गर्ने हो भने दल खोलेर राजनीतिमा आउन सक्नु हुन्छ, तर मुलुक फेरि प्रतिगमन तिर फर्कन्छ कि भन्ने लागेको छ भने त्यो सम्भव छैन’, उनले भने ।
देश धेरै अगाडि बढेकोले राजतन्त्रको काखमा बसेर आनन्द लिन सकिन्छ कि भन्ने सपना नदेख्न उनले आग्रह गरे । मरिसकेको राजतन्त्रको काखमा बसेर खेल्ने कुरा अब सपना मात्र भएको उहाँले स्पष्ट भएको ढकालले स्पष्ट पारे ।
