नेकपा एस अनेरास्ववियू खनाल-नेपाल गुटको अलग-अलग भेला
नेकपा एससम्बद्ध अनेरास्ववियूले सोमबार काठमाडौँमा अलग अलग भेलाको आयोजना गरेका छन् ।आरती लामा समूह समानान्तर कमिटी घोषणासम्मको तयारीमा छ । यद्यपी कमिटी घोषणा गर्ने कि नगर्ने भन्ने कुरा पार्टी केन्द्रीय कमिटी बैठकको निर्णय सार्वजनिक गर्ने पत्रकार सम्मेलनपछि मात्रै टुङ्गो लाग्ने उक्त समूहका नेता नरेश न्यौपानेले बताए । आरती समूहले ‘उपत्यका प्रदेशस्तरीय भेला’ को नाममा कार्यक्रम गर्ने भएको छ । उपत्यका प्रदेश अध्यक्ष प्रदीप थापा उक्त पक्षमा भएको कारण सोही भेला आधिकारिक हुने न्यौपानेको दाबी छ । उनका अनुसार पार्टीले सम्मानित नेता झलनाथ खनालद्धारा प्रस्तुत सुझावअनुसार कुनै निर्णय सार्वजनिक भए कमिटी घोषणा कार्यक्रम रोकिनेछ । ‘६ वटा प्रदेशका अध्यक्षहरू काठमाडौँ आउँदै हुनुहुन्छ, उहाँहरूसँग सरसल्लाह गरेर अगाडी बढ्छौ’ उनले भने । आरती पक्षले अर्को पक्षसँग मिलनविन्दूका रुपमा महासचिव पदको दाबी गरेको छ । तर, माधव नेपाल पक्षले कास्कीका राजन शर्मा पराजुलीलाई महासचिव घोषणा गरिसकेको छ । महेश श्रेष्ठ अध्यक्ष रहेको माधव नेपाल पक्षीय समूहले दिउँसो १ बजे प्रदर्शनीमार्गस्थित रत्न राज्यलक्ष्मी क्याम्पसमा उपत्यका भेलाको आयोजना गर्दै छ ।
आरती लामा नेतृत्वको झलनाथ खनाल पक्षीय समूहले ललितपुर बालकुमारीस्थित क्याफफोर्ड कलेजमा बिहानैदेखि आफूपक्षीय नेता,कार्यकर्तालाई जम्मा पार्दै छ । त्यहाँ भोली क्याम्पस कमिटी गठनको कार्यक्रम पनि छ । माधव नेपाल पक्षीय कमिटीले आज १२ गतेका लागि काठमाडौँमा केन्द्रीय कमिटी बैठकको आयोजना गर्ने कार्यक्रम रद्द भएको छ । अध्यक्ष महेश श्रेष्ठका अनुसार स्ववियु निर्वाचनको तयारीका निम्ति आज उपत्यका भेला मात्रै गर्न लागिएको हो । ‘अब स्ववियु चुनाव आयो,हाम्रो पुरै ध्यान त्यसतर्फ केन्द्रित छु’ श्रेष्ठले भने । आरती लामा पक्षले पार्टीको पत्रकार सम्मेलनपछि शंखमुलस्थित ए वन पार्टी प्यालेसमा कार्यक्रम गर्ने गरी हल बुक गरिसकेको नेता न्यौपानेले बताए । ‘हामीसँग कमिटी घोषणा गर्ने पुरानै ब्यानर छ, सम्मानित नेताको आग्रहमा यसअघिको कार्यक्रममा त्यो ब्यानर नटाँसिएको हो’ न्यौपानेले भने । दुई समूहमध्ये आरती पक्ष बलियो रहेको न्यौपानेको दाबी छ । महेश समूहले भेला आयोजना गर्न लागेको रत्न राज्यलक्ष्मी क्याम्पसमै सङ्गठनको कमिटी छैन । कमिटी भएका ल क्याम्प र वाल्मीकि क्याम्पस कमिटी आरती पक्षमा खुलेका छन् ।
