भावी पुस्ताले बिर्सन नमिल्ने दिन फागुन ७ : प्रधानमन्त्री
प्रधानमन्त्री केपी शर्मा ओलीले फागुन ७ गतेले शासनको स्वरूपमात्र नभई सबै हिसाबले स्वतन्त्र र सार्वभौम बनाउने दृढ संघर्ष अघि बढाएको बताएका छन् । टुँडिखेलमा प्रजातन्त्र दिवसको विशेष समारोहमा प्रधानमन्त्री ओलीले हुकुमी निगाहबाट हुने पजनी फेरेर निजामती प्रशासनको जग हालेको उल्लेख गरे । उनले आजको दिन यातनादायी र कहालीलाग्दो क्षणको स्मरणसमेत गरेका छन् । भावी पुस्ताले आजको दिनलाई बिर्सन नमिल्ने पनि बताए ।
ओलीले भने, ‘प्रजातन्त्रको उज्यालोमा हुर्किएको, अत्याधुनिक सूचना प्रविधिमार्फत अनलाइन सेवा लिने बानी परिसकेको आजको पुस्ताका लागि हिजोको शासनको त्यो क्रूरता- अनुभव होइन, कथामात्र हो ! तसर्थ, हाम्रो भविष्यका रुपमा उदाउँदै गरेको भोलिको पुस्ताले यो दिन, बिर्सनै नमिल्ने दिन हो ! नेपाली लोकतान्त्रिक आन्दोलनको इतिहासमा चैत २६, वैशाख ११, जेठ १५, र असोज ३ ले विशेष महत्व राख्ने बताउँदै प्रधानमन्त्री ओलीले ती सबै दिनभन्दा युगान्तकारी महत्व फागुन ७ ले राख्ने बताएका छन् ।
