नेपाललाई कुनै विद्रोह आवश्यक छैन, एमालेले संविधान खारेज गर्दैन : योगेश
माओवादी केन्द्रका अध्यक्ष पुष्पकमल दाहाल प्रचण्डले ओली संविधान खारेज गर्ने पक्षमा रहेको अभिव्यक्तिको नेकपा एमालेका सचिव योगेश भट्टराईले जवाफ फर्काएका छन् । प्रतिनिधिसभाको बैठकपछि सञ्चारकर्मीहरुसँग कुरा गर्दै उनले एमाले संविधान बनाउने पार्टी भएकाले सुदृढ गर्ने पक्षमा रहेको बताए । सोमबार जनकपुर विमानस्थलमा पत्रकारसँग कुरा गर्दै प्रचण्डले मुलुकमा प्राप्त परिवर्तनका साथै संविधान नै खारेज गर्ने पक्षमा प्रधानमन्त्री ओली रहेको आरोप लगाएका थिए ।
त्यसको जवाफ दिँदै भट्टराईले भने, ‘एमाले र कांग्रेस संविधान खारेज वा च्यात्ने नभई संरक्षण पर्ने पक्षमा छन् । हामी सबै दलको समर्थन जुटाएर २०८४ को निर्वाचनअघि नै संशोधन गर्छौँ । अहिले आन्तरिक गृहकार्य सुरु भइसकेको छ । एमाले सचिवसमेत रहेका सांसद भट्टराईले नेपालमा अब कुनै विद्रोह नचाहिने पनि बताए । उनले भने, ‘नेपालका अब कुनै विद्रोह आवश्यक छैन । अब क्रान्ति गर्छु, विद्रोह गर्छु, आन्दोलनमा जान्छु भन्ने कुरा इमोशनल ब्ल्याकमेलिङ हो, त्यसको कुनै अर्थ छैन ।
