२०८४ को चुनावपछि पनि मिलेर देखाउनुहोला : देवेन्द्र पौडेल
नेकपा माओवादी केन्द्रका सचिव देवेन्द्र पौडेलले आफूहरु अहिले सरकार ढाल्ने खेलमा नरहेको बताएका छन् । रिपोर्टर्स क्लवको साक्षात्कार कार्यक्रममा बोल्दै उनले कांग्रेस नेताहरुसँग अनौपचारिक छलफल भएपछि सरकार ढाल्ने विषयलाई लिएर अहिलेसम्म कुनै कुराकानी नभएको बताए । उनले भने, ‘हामी अहिले सरकार ढाल्ने खेलमा छैनौं । उहाँलाई शुभकामना छ, मिलेर २०८४ सम्म जानुहोला । सक्नुहुन्छ भने २०८४ को चुनावपछि पनि मिले हामीलाई कुनै आपत्ति छैन ।नेता पौडेलले आफूहरुले सरकारको गतल क्रियाकलापको भण्डाफोर गर्ने बताए । कांग्रेस नेताहरुसँगको भेटबारे उनले भने, ‘कहीँ विमानस्थलमा भेट भयो होला । संसदमा भेटिन्छ, चिया कफी खाइन्छ, तर अफिसियल रुपमा सरकार ढाल्ने कुनै वार्ता गरेको छैन । त्यस्तो खेलमा छँदा पनि छैनौं । सरकार आफैं ढलेछ भने हामीले त्यसबेला सोचौंला ।’
दुई तिहाइको शक्ति भएको सरकार अध्यादेश ल्याएर ढोकाबाट नभई झ्यालबाट छिर्न खोजेको उनले आरोप लगाए । उनले सरकारले राष्ट्रियसभामा पेश गरेको सामाजिक सञ्जालसम्बन्धी विधेयक पनि पुनर्लेखन गर्नुपर्ने बताए ।
