समाजवादी प्रेस संगठनका अध्यक्ष विश्वमणि सुवेदी प्रेस चौतारीमा प्रवेश गर्दै
समाजवादी प्रेस सङ्गठन नेपालका अध्यक्ष विश्वमणि सुवेदी पार्टी परित्याग गर्दै प्रेस चौतारीमा प्रवेश गर्ने भएका छन् । माधव नेपाल नेतृत्वको नेकपा एकीकृत समाजवादी निकट समाजवादी प्रेस सङ्गठनका अध्यक्ष सुवेदी एमाले निकट पत्रकारहरूको संस्था प्रेस चौतारीमा जान लागेका हुन् । एमाले महासचिव शंकर पोखरेलले उनलाई आज पार्टीमा प्रवेश गराउने तयारी गरेका छन् । यसकालागि बागबजारको एउटा होटलमा कार्यक्रमको आयोजना गरिएको एमालेले जनाएको छ ।
पत्रकार महासंघको चुनावका क्रममा सुवेदीसँग पार्टी नेतृत्व असन्तुष्टि रहदै आएको थियो । नेकपा एकीकृत समाजवादीका पूर्व प्रचार विभाग सदस्य समेत रहेका सुवेदीलाई पार्टीको प्रतिष्ठामाथि आँच आउनेगरी विचार तथा समाचार लेखेको भन्दै बिहीबार मात्र स्पष्टीकरण सोधेको थियो ।
संगठन छोड्ने सोचमा रहेका सुवेदीलाई पार्टीको स्पष्टिकरणले चौतारी प्रवेशका लागि थप सजिलो बनाइदिएको छ । पार्टी विभाजन हुनु अघि सुवेदी प्रेस चौतारीका उपाध्यक्ष थिए । पार्टी विभाजनपछि माधव नेपाललाई साथ दिदै सुवेदीले एमाले परित्याग गरेका थिए । चलायमानमध्येको एउटा संगठनको अध्यक्ष नै अर्को पार्टीमा जाने भएपछि समाजवादी नेतृत्वमाथि कार्यकर्ता टिकाउन नसकेको आरोप लागेको छ ।
