ब्यूँतियो समाजवादी मोर्चा, आलोकनगरमा बैठक जारी

 

 

समाजवादी मोर्चाको बैठक सुरू भएको छ । नेकपा एकीकृत समाजवादीको केन्द्रीय कार्यालय आलोकनगरमा बैठक केही समयअघिबाट जारी छ । मोर्चामा नेकपा माओवादी केन्द्र, नेकपा एकीकृत समाजवादी, विप्लव नेतृत्वको नेकपा र महेन्द्रराय यादव नेतृत्वको नेसपा सहभागी छन् । लामो समयदेखि निष्क्रिय रहेको मोर्चा नेकपा माओवादीका अध्यक्ष प्रचण्ड र नेकपा एसका अध्यक्ष माधव नेपालको सक्रियतमा ब्यूँताइएको हो । बैठकमा माओवादीबाट प्रचण्डसहित वरिष्ठ उपाध्यक्ष नारायणकाजी श्रेष्ठ, महासचिव देव गुरुङ, उपमहासचिव वर्षमान पुन, नेकपा एकीकृत समाजवादीका अध्यक्ष नेपालसहित वरिष्ठ नेता प्रमेश हमाल, महासचिव घनश्याम भुसाल, नेकपाका महासचिव विप्लव र प्रवक्ता खड्गबहादुर विश्वकर्मा र नेपाल समाजवादी पार्टीका अध्यक्ष यादव र सहअध्यक्ष गङ्गानारायण श्रेष्ठ सहभागी छन् । यसअघि दुवै दलका शीर्ष नेताहरूको बैठक बसेर मोर्चालाई सक्रिय बनाउने सहमति गरेको थिए । कांग्रेस नेतृत्वको गठबन्धनमा हुँदा प्रचण्डले सरकार टिकाउने अस्त्रका रूपमा चार दललाई समेटेर मोर्चा गठन गरेका थिए । प्रचण्ड सरकारमै हुँदा उपेन्द्र यादव नेतृत्वको जसपा नेपाल विभाजित भएपछि सो दल मोर्चाबाट बाहिरिएको छ । यद्यपि, प्रचण्ड-माधवले मोर्चामा फेरि जोड्ने प्रयास जारी राखेका छन् ।