मेडिकल व्यवसायी दुर्गा प्रसाईं हिरासतबाट छुटे
मेडिकल व्यवसायी दुर्गा प्रसाईं हिरासतबाट छुटेका छन् । न्यायाधीशहरू नहकुल सुवेदी र सारंगा सुवेदीको इजलासले प्रसाईंलाई रिहा गर्न आदेश दिएपछि केन्द्रीय अनुसन्धान ब्युरो (सिआइबी) को हिरासतमा रहेका प्रसाईं छुटेका हुन्।आपराधिक लाभ र संगठित अपराध कसुरमा अनुसन्धान गर्न भनेर प्रहरीले प्रसाईंलाई हिरासतमा लिएर अनुसन्धान गरेको थियो । प्रसाईंले प्रधानमन्त्री केपी शर्मा ओलीको कम्बोडियाको टेलिकममा लगानी गरेको भन्दै सार्वजनिक अभिव्यक्ति दिएका थिए । लगानी गरेको प्रमाण भन्दै विभिन्न कागजातहरू पनि ‘सार्वजनिक’ गरेपछि उनलाई सिआइबीले मंसिर ४ गते भक्तपुरस्थित निवासबाट पक्राउ गरेको थियो । उनीविरूद्ध विद्युतीय कारोबार ऐन २०६३ अनुसार साइबर ब्युरोले अनुसन्धान गरी जिल्ला अदालत काठमाडौंमा मुद्दा पेस गरेको थियो ।
