शेखर-गगनबीच तीन घण्टा गोप्य वार्ता

 

 

कोशी विद्रोहपछि नेपाली कांग्रेसका नेता डा. शेखर कोइराला र महामन्त्री गगन थापाबीच पहिलो पटक भेटवार्ता भएको छ । कोशीमा शेखरले एकलौटीरूपमा विद्रोह गरेर एमालेसँग मिलेर सरकार बनाएपछि गगनसँग दूरी बढेको थियो । तर, शेखर र गगनलाई मिलाउन गगनका ससुरासमेत रहेका नेता अर्जुननरसिंह केसीले मध्यस्थकर्ताको भूमिका खेलेका छन् । नेता केसीकै पहलमा सोमबार शेखर र गगनबीच भेटवार्ता भएको हो । कांग्रेसनिकट स्रोतले भन्यो, ‘हिजो शेखर र गगन दाइबीच नेता अर्जुननरसिंह केसीको निवासमा तीन घण्टा छलफल भएको थियो । त्यही भएर आज शेखर दाइले बेलाउनुभएको भेला रोकेर भोलिलाई राख्नुभएको हो । भोलिकै बैठकमा आउन गगन दाइ पनि तयार हुनुहुन्छ । भेटमा महामन्त्री थापाले कोशीमा व्रिदोह गर्दा समूहमा छलफल नगरेको भन्दै असन्तुष्टि पोखेको ती नेताले बताए । स्रोत भन्छ, ‘उहाँहरूबीच कोशीको निर्णय लिँदा छलफल भएन भन्ने नै हो । हाम्रो महामन्त्रीजीको गुनासो पनि त्यही थियो । अब अहिलेसम्म जे भयो भयो । अब एउटा निश्चित मिसनको लागि अगाडि बढ्नुपर्छ भन्ने सहमति बनेको छ । १५औं महाधिवेशनमा केन्द्रित भएर एकजुट हुनेमा पनि उनीहरू एकमत रहेको ती नेताले बताए ।

शेखरसँग दूरी बढेपछि महामन्त्री थापा पछिल्लो समय विश्वप्रकाश शर्मा र प्रदीप पौडेलसँग नजिकिएका छन् । उनीहरूलाई पनि आगामी दिनमा गुटमा समेट्न दुई नेताबीच छलफल भएको बताइन्छ । तर, शेखर गगन दुबैजना सभापतिको तयारीमा छन् । हिजोको भेटमा उनीहरूले सभापति शेरबहादुर देउवाको कार्यशैली सुधार नआउने निष्कर्षसहित नयाँ ढंगले अघि बढ्नेमा सहमत भएको बताइएको छ । ती नेताले भने, ‘पार्टीभित्रको कार्यशैलीलाई सुधारवादी आन्दोलन प्रक्रियामा लागेका छौं । त्यसलाई गति दिनुपर्छ । महासमितिको बैठक बस्दैछ । त्यसमा पार्टीलाई सही ढंगले अघि बढाउने नीति तयार गर्नुपर्छ । हामीले आगामी महाधिवेशनबाट पार्टीलाई रुपान्तरण गर्नुपर्छ । तर, भोलिको इतर पक्षको भेलामा समसामयिक राजनीतिक विषयमा छलफल हुने नेता अर्जुननरसिंह केसीले बताए । उनले भने, ‘अहिले देशको अवस्था जटिल छ । भ्रष्टाचारका काण्ड पनि आइरहेका छन् । राष्ट्रिय परिवेश जुन ढंगले निर्माण भइरहेका छ । हामी सरकारको शक्तिशाली अंग पनि हौं । त्यसलाई सम्बोधन गर्नको लागि अगाडि बढ्नुपर्छ । हामी साक्षीमात्रै बसेर हुँदैन ।