एकदिन पनि टिकेन शेयर बजारको उछाल- १५ अंकले गिरावट
शेयरबजार खुलेसँगै ओरालो झरेको बजार लामो उतार चढावपछि १५ अंकले घटेर बन्द भएको छ । साताको दोस्रो दिन सोमबार नेप्से परिसूचक १५.४० अंकले घटेर १९४८.५७ बिन्दुमा कायम भयो ।
यसदिन बजारमा ‘सेलिङ प्रेसर’ उच्च रहँदा १ करोड ४६ लाख ९८ हजार ५१७ कित्ता सेयरको खरिदबिक्री हुुँदा ४ अर्ब ८४ करोड २७ लाख ७४ हजार ३८६ रूपैयाँको कारोबार भएको छ । हिजोमात्रै नेप्से परिसूचक १११.२० अंकले बढेर १९६३ बिन्दुमा कायम भएको थियो । भने, १३ लाख ६७ हजार ६१५ कित्ता शेयरको खरिद बिक्री हुँदा ४८ करोड २४ लाख ८२ हजार रुपैयाँको कारोबार भएको थियो । तेस्रो पटकसम्म सकारात्मक सर्किट लागेपछि दिनभरलाई कारोबार नै बन्द गरिएको थियो ।
अघिल्लो दिनमात्रै ६ प्रतिशतले बढेको सेयरको रौनक एकदिनमै हराएको छ । जहाँ नाफा बुक गर्ने लगानीकर्ताहरूले बजारलाई उछाल्ने र पछार्न मात्रै गरेको लगानीकर्ताहरुको भनाइ छ । आज बजार दोहोरो अंकले घटेपनि कारोबार भने हवात्तै बढेको छ । जहाँ एकैदिन बोटल्स नेपाल (बालाजु) लिमिटेड, सामुदायीक लघुवित्त वित्तीय संस्था लिमिटेड र डोल्टी पावर कम्पनी लिमिटेडको सेयरमा साकारात्मक सकिर्ट लगेको छ । त्यस्तै, कारोबारका आधारमा आज सोनपुर मिनरल्स एण्ड आयल २५ करोड १५ लाख ६० हजार रुपैयाँको कारोबारका साथ शिर्ष स्थानमा रहेको छ ।
