एमालेको संकल्प यात्रा- दोलालघाटमा ओलीले तारे माछा

 

 

झुलाघाट-चिवाभञ्ज्याङ समृद्धिका लागि संकल्प यात्राको १२औं दिन आज बिहान एमालेको टोलीले काभ्रेको दोलालघाट पुगेको छ । त्यहाँ स्थानीयसँगको अन्तरक्रियापश्चात अध्यक्ष केपी शर्मा ओलीले माछा तारेका छन् । सिन्धुपाल्चोकसँग सिमानामा रहेको दोलालघाट बजार माछाका लागि चिनिएको ठाउँ हो । यहाँ स्थानीय र कार्यकर्ताले एमाले शीर्ष नेतालाई माछाको सगुनबाट स्वागत गरे । केहीबेर स्थानीयका समस्या र सुझाव सुनेर छोटो सम्बोधन गरेपछि ओलीले माछा तारेका थिए । दोलालघाटको पर्यटनलाई अझ उजागर गरिदिएको भन्दै स्थानीयले आभार व्यक्त गरे । ‘इन्द्रावती र भोटेकोशी नदीको सङ्गमस्थल दोलालघाट माछाको लागि प्रख्यात छ । यहाँको व्यापार व्यवसायबारे थोरै कुराकानी भयो । माछा खान आउनेहरू यहाँ धेरै भेटिन्छन् । यात्राको क्रममा हामी दोलालघाट ओर्लियौं, मैले माछा तारेर साथीहरूलाई खुवाएँ’, ओलीले फेसबुकमा समेत दोलालघाटबारे लेखेका छन् ।