जनताको समर्थनले एमालेप्रतिको भरोसा प्रतिविम्बित गरेको छ : उपमहासचिव गुरूङ

 

 

नेकपा (एमाले) का उपमहासचिव पृथ्वीसुब्बा गुरूङले मध्यपहाडी लोकमार्ग पदयात्राका क्रममा अपार जनसहभागिता र जनताको व्यापक समर्थनले एमालेप्रतिको भरोसा प्रतिविम्बित गरेको बताएका छन् । सुदूरपश्चिम र कर्णालीमा एमालेको अभियान अद्भूत रुपमा सफल भएको गुरूङले बताएका छन् । जनता साँच्चीकै एमालेले हिजोका दिनमा गरेका विकास निर्माणबाट प्रभावित भएको मात्रै नभई भविष्यका लागि पनि आशावादी र विश्सनीय भएको पाइएको उनले उल्लेख गरेका छन् । दुईवटा प्रदेशमा एमालेप्रति देखिएको जनलहरले देशमा व्याप्त निराशालाई चिर्दै अघि बढ्ने थप प्रेरणा एमाले पार्टी र नेता, कार्यकर्ताहरूलाई मिलेको उपमहासचिव गुरूङले बताएका छन् ।

एमालेको मध्यपहाडी लोकमार्ग केन्द्रित अभियानले गाउँगाउँमा फेरि एउटा राजनीतिक लहर सिर्जना गरेको प्रमाणहरूमा ठाउँठाउँमा जनताले स्वस्फूर्त बनाएका स्वागतद्वार, प्रदर्शन गरेका झाँकी र कार्यक्रमको सहभागिता भएको उनको भनाइ छ । एमाले अभियानले पार्टीमा मात्रै पुनर्ताजगी पैदा नगरी समग्र जनतामा ओइलाएको राजनीतिप्रति दृष्टिमा सकारात्मक ऊर्जा दिएको गुरूङको धारणा छ । विकट र पिछडिएको भनिएको सुदूरपश्चिम साँच्चीकै प्राकृतिक रुपमा सुन्दर सुदूरपश्चिम देखिएको/भेटिएको उनले बताएका छन् । विस्तारै वामे सरेको यी क्षेत्रका विकास निर्माणलाई एमाले सरकारमा पुगेका बखत अवश्य रफ्तारमा अघि बढाउने प्रतिवद्वता पनि उनले व्यक्त गरेका छन् ।