केही दल सरकार ढाल्न र गठबन्धन फुटाउन लागेका छन् : प्रधानमन्त्री

 

 

प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहालले पार्टीले सुरू गरेको तीन महिने विशेष रुपान्तरण अभियान माओवादी घटक दलबीचको एकताको अभियान पनि रहेको बताएका छन् । रुकुम पश्चिमको बाँफिकोट गाउँपालिका-६ मग्गामा बिहीबार आयोजित सहिद स्मृति मेलाको उद्घाटन गर्दै उनले अब माओवादीबाट फुटेर गएका दलहरुका बीचको एकताको आवश्यकता रहेको बताए ।

प्रचण्डले भने, ‘हामी ठूलो पार्टीको रूपमा उदाएका थियौं । विडम्बना हामी सबै फरक-फरक बाटोतिर लाग्यौं । हामीले क्रान्ति गर्ने बेला जुन किसिमको प्रतिवद्धता जनतासामु गरेका थियौं, त्यो प्रतिवद्धता भुल्दै साथीहरू फरक बाटोतिर लाग्नुभयो । शान्ति प्रक्रियापछि उहाँहरूलाई के कुरा चित्तै बुझेन पार्टी नै फुटाउनुभयो । सरकार ढाल्न र गठबन्धन फुटाउनतर्फ केही दल लागिपरेको उनको आरोप छ । सरकारले पछिल्लो समय सामाजिक न्यायको लागि विभिन्न भ्रष्टाचारको फाइल खोलेको देख्दा केही दल सरकार ढाल्ने प्रयासमा रहेको उनको जिकिर छ ।