देशको समस्या समाधान गर्ने अभिभारा एमालेको काँधमा छ : अध्यक्ष ओली

 

 

नेकपा एमालेका अध्यक्ष केपी ओलीले अहिलेको देशको समस्या समाधानको अभिभारा नेकपा एमालेका काँधमा रहेको बताउनुभएको छ । नेकपा एमाले वाग्मती प्रदेशको प्रथम अधिवेशनको उद्घाटन समारोहलाई आज भृकुटीमण्डप, काठमाडौंमा सम्बोधन गर्दै अध्यक्ष ओलीले समृद्ध नेपाल, सुखी नेपाली बनाउने अभिभारा नेकपा एमालेको काँधमा रहेको बताउनुभयो । एमालेको वाग्मती प्रदेश अधिवेशन पार्टी र देश विरुद्धको घेराबन्दी तोड्न सफल हुने ओलीले विश्वास व्यक्त गर्नुभयो। उहाँले भन्नुभयो, ‘मिसन २०८४ लाई कसरी पूरा गर्छौं भन्ने कुरामा यो अधिवेशन ऐतिहासिक हुने छ । नेकपा एमाले समाज रूपान्तरण र विकास, राष्ट्रियताको रक्षा लगायतका विषयमा सदैव गम्भीर रहेको बताउनुभयो। एमालेले राष्ट्रिय शक्ति र राष्ट्रिय भावनाको प्रतिनिधित्व गर्दै आएको उहाँले दाबी गर्नुभयो ।

अध्यक्ष ओलीले वाग्मती प्रदेशलाई समृद्ध बनाउन एमाले वाग्मती प्रदेशले त्यसै अनुसारको नेतृत्व दिने पर्ने बताउनुभयो । समृद्ध नेपाल सुखी नेपाली बनाउने राष्ट्रिय आकांक्षालाई पूरा गर्न वाग्मती प्रदेशले महत्त्वपूर्ण भूमिका खेल्ने ओलीले विश्वास व्यक्त गर्नुभयो । नेकपा एमाले विचार, नीति र उद्देश्य सहितको पार्टी भएको उहाँले प्रष्ट पार्नुभयो। उहाँले भन्नुभयो, ‘आज विचारमा कुनै द्विविधा छैन नेकपा एमाले भित्र । वाग्मती सभ्यता विश्वकै नमुना र ऐतिहासिक स्थल भएको ओलीले बताउनुभयो । नेपाल प्राकृतिक हिसाबले सुन्दर मात्र होइन विकास र समृद्धिको समेत उद्गमस्थल भएको ओलीले बताउनुभयो । यस्तो सभ्यता बोकेको ठाउँ गरिब र अशिक्षित हुनु नहुने र त्यो कुरा नेकपा एमालेलाई मञ्जुर नरहेको र यसलाई सुधारेरै छाड्ने उहाँले दाबी गर्नुभयो ।