देउवालाई मत दिएका ओली पक्षीय सांसद के भन्छन् ?
सोमबार प्रतिनिधिसभा बैठकमा प्रधानमन्त्री शेरबहादुर देउवाले मागेको विश्वासको मत दिने क्रममा अनेकन विचित्रका घटनाहरू देखिए । पार्टीले कुनै किसिमको ह्वीप जारी गर्न नसक्ने भएपछि सांसदहरूले मनलाग्दी गर्न भ्याए । सांसदहरूले आफ्नो धरातल समेत बिर्सिएर आफ्नो अधिकार प्रयोग गर्दै शेरबहादुर देउवालाई विश्वासको मतबाट विजयी गराए ।
खासगरी नेकपा एमालेभित्रको विवादको फाइदा उठाउँदै प्रधानमन्त्रीले आइतबार हतार–हतार विश्वासको मत लिने निर्णय गरे । तर, बेलुकी बैठक शुरू हुनै लाग्दा देउवालाई एमालेको १ मत पनि नचाहिने अवस्था बन्यो । तर, एमालेका केही सांसदहरूले भने देउवाकै पक्षमा मतदान गरेर आफूलाई ‘बहादुरी’ सावित गराए । आइतबार प्रतिनिधिसभामा देउवाले प्रस्तुत गरेको विश्वासको मतको पक्षमा एमालेका २२ जना सांसदले मत दिएका थिए भने नेपालपक्षीय ११ जना सांसद उक्त मतदानमा अनुपस्थित भए । मत दिएकामध्ये ओलीको पक्षधर मानिएका र ओली मन्त्रिपरिषद्मा सदस्य रहेका समेत छन् ।
अन्तिम समयसम्म ओलीको पक्षमा रहेका तर आइतबार देउवालाई विश्वासको मत दिएका एक सांसदले ‘आफूले सर्वोच्च अदालतको आदेशको सम्मान गर्न’ देउवालाई मत दिएको दाबी गरेका छन् । ‘सर्वोच्च अदालतको फैसलाको सम्मान गरेको हो मैले । सर्वोच्च अदालतले विश्वासको मत दिने बेलासम्म कुनै ह्विप लाग्दैन भनेको छ,’ ती सांसदले भने । आफूलाई जनताले पाँच वर्षका लागि चुनेर पठाएको र पाँचै वर्ष संसद टिकाउनका लागि आफूले योगदान गरेको ती सांसदको भनाइ छ ।
पटक–पटक संसद् विघटन भइरहेको अवस्थालाई दृष्टिगत गर्दै आइतबार पनि आफूले विश्वासको मत नदिँदा संसद् पुनः विघटन हुने चिन्ताका साथ शेरबहादुर देउवालाई मत दिएको ती सांसदले बताए । विश्वासको मत हालेकै आधारमा पार्टीले आफूलाई कारबाही गर्न नसक्ने दाबी समेत उनको छ । तर, आजै बसेको नेकपा एमालेको १०औं केन्द्रीय समितिको बैठकले देउवालाई विश्वासको मत दिने २२ जना सांसदहरूलाई २४ घण्टाभित्र स्पष्टीकरण पेश गर्न निर्देशन गरिसकेको छ । यद्यपि, विश्वासको मत दिने सांसदलाई कारबाही नगर्नू भन्ने सर्वोच्च अदालतको फैसलाबमोजिम फ्लोर क्रस गर्ने सांसद वा पार्टी सदस्यलाई कारबाही गर्ने निर्णयले खासै अर्थ नराख्ने बुझिएको छ ।
