म्यानमारमाकी नेता सुची गिरफ्तार, सैनिक ‘कु’को सम्भावना
म्यानमारको सत्ताधारी नेशनल लिग फर डेमोक्रेसी (एनएलडी)की सर्वोच्च नेता आङ सान सुचीलाई सेनाले गिरफ्तार गरेको छ । यहाँ सैनिक ‘कु’ को आशंका गरिएको छ किनभने पछिल्ला केही महिनायता नागरिक सरकार र सैनिक नेतृत्वबीच टकराव थियो ।
नोभेम्बर महिनामा सम्पन्न चुनावमा एनएलडीले सरकार बनाउनका लागि पर्याप्त सिट जितेको थियो । तर म्यानमारको सेनाले भनेको छ कि ती मतहरु सबै फर्जी थिए ।
बर्माको नामबाट पनि परिचित म्यानमारमा सन् २०११ सम्म सैनिक शासन थियो । त्यतिबेलासम्म प्रजातन्त्रवादी नेतृ सुचीलाई घरमै नजरबन्द गरिएको थियो ।
नवनिर्वाचित प्रतिनिधिसभाको बैठक सोमबार (आज)का लागि बोलाइए पनि सेनाले बैठक सार्नका लागि दवाव दिइरहेको थियो । त्यसकै परिणाम सैनिक कु हुनसक्ने आकलन गरिएको छ । म्यानमारको राजधानी नेपिताव र मुख्य शहर याङगोनका सडकमा सेनाको बाक्लो उपस्थिति देख्न सकिन्छ ।
मुख्य शहरहरुमा मोबाइल इन्टरनेट तथा केही कम्पनीका टेलिफोन सेवा पनि बन्द भएका छन् । राज्यको मुख्य टेलिभिजन एमआरटिभीले प्राविधिक समस्या भन्दै प्रशारण बन्द गरेको छ ।
