अध्यादेश ल्याउने सरकारको तयारी
संसदमा दुई तिहाइ नजिक बहुमत रहेको नेपाल कम्युनिस्ट पार्टी (नेकपा) को एकता गम्भीर संकटमा परेको छ । यसको पुष्टि नेकपाका महासचिव तथा अर्थ मन्त्री विष्णु पौडेलले सामाजिक सञ्जाल फेसबुकमार्फत २०७७ कात्तिक १६ गते गरेका छन् । केपी ओली र प्रचण्ड–माधव नेपाल समूह आ–आफ्नो अडानमा अडिग बनेपछि ३ वर्षको शैशवकालमा हिँडिरहेको नेकपाको भविष्य पुनः गम्भीर संकटमा परेको हो । यसले अहिलेको राजनीतिक कोर्ष परिवर्तन हुनसक्ने र देश फेरि राजनीतिक अस्थिरतातर्फ धकिलिने अनुमान पनि गर्न थालिएको छ ।
नेकपाभित्र यसअघि देखापर्ने विवाद समाधान गर्न भूमिका खेल्दै आइरहेका अर्थमन्त्रीसमेत रहेका विष्णु पौडेल स्वयंले नेकपाको एकीकृत र अविभाज्य अस्तित्वसामू गम्भीर संकट उत्पन्न भएको ट्वीट समेत गरेका छन् । यसले नेकपा गम्भीर संकटमा परेको पुष्टि गरेको छ ।
पार्टीभित्रको विवाद गहिरिँदै गएपछि सरकारले २ अध्यादेशको तयारी अघि बढाएको चर्चा चलेको छ । यसअघि २०७७ वैशाखमा पार्टीभित्रको विवाद उत्कर्षमा पुगेका बेला पार्टी अध्यक्ष् तथा प्रधानमन्त्री केपी ओलीले दल विभाजन र संवैधानिक परिषद्सम्बन्धी २ अध्यादेश ल्याएका थिए । अहिले पुनः त्यसैलाई व्यँुताउन लागिएको स्रोत बताउछ । दल विभाजनका लागि केन्द्रीय समिति र संसदीय दलमा ४०/४० प्रतिशत सदस्यको सहमति हुनुपर्ने प्रावधानलाई सच्याएर संसदीय दलमा ४० प्रतिशत पु¥याउँदा पनि पार्टी विभाजन गर्न मिल्ने व्यवस्था अध्यादेशमा गरिएको थियो ।
प्रमुख प्रतिपक्षी दलका नेता अनुपस्थित रहे पनि गणपूरक संख्या पुगेको अवस्थामा बहुमतले निर्णय गर्न सकिने अर्को अध्यादेश पनि ल्याइएको थियो । चर्को दबाबपछि फिर्ता गरिएको अध्यादेशमा सामान्य परिवर्तन गरेर पुनः ल्याउने तयारी फेरि अघि बढाइएको स्रोत बताउँछ । अब आउने संवैधानिक परिषद्सम्बन्धी अध्यादेशमा प्रमुख विपक्षी दलका नेताको अनिवार्य उपस्थितिमा बहुमतले निर्णय गर्नेगरी अध्यादेश आउन लागेको स्रोत बताउछ । प्रचण्डले पार्टी फोड्न खोजेपछि सरकारले अध्यादेश ल्याउने तयारी गरेको स्रोतको दाबी छ ।
