उद्योग बाणिज्य महासंघमा चन्द्र ढलकाल समूहको उम्मेदवारी घोषणा
नेपाल उद्योग बाणिज्य महासंघको चुनावका लागि बरिष्ठ उपाध्यक्षसहितका पदमा चन्द्र ढकालले प्यानलसहित उम्मेदवारी घोषणा गरेका छन् ।
ढकाल समूहले मंगलबार एक कार्यक्रमको आयोजना गरेर प्यानल घोषणा गरेको हो । यो प्यानलबाट ढकाल बरिष्ठ उपाध्यक्ष पदको उम्मेदवार हुनेछन् । ढकालले उम्मेदवारीको घोषण गर्दै आफ्नो प्यानल विजयी हुने दावी पनि गरे । ढकालले वरिष्ठ उपाध्यक्ष शेखर गोल्छाले अर्का प्यानललाई सहयोग गर्न खोजेको भन्नेतर्फ संकेत गर्दै चुनाव जितेर गोल्छाकै टिमको सदस्य हुने बताए । ढकालले भने, ‘शेखर गोल्छा अर्को प्यानलमा लाग्नुभएको छ, त्यो अशोभनीय छ। उहाँ सबैको साझा बन्नुपर्छ ।’
कार्यक्रममा उनले अर्को प्यानलका साथीहरुले सबै व्यवसायीको हित गर्न नसक्ने पनि दाबी गरे। ढकालको प्यानलबाट वस्तुगत उपाध्यक्षतर्फ उमेशलाल श्रेष्ठ, एसोसिएट उपाध्यक्षतर्फ रामचन्द्र संघाई, जिल्ला नगर उपाध्यक्षतर्फ गुणनिधि तिवारीले पनि उम्मेदवारी घोषणा गरेका छन्।
महासंघको निर्वाचन आगामी साउन २५ र २६ गतेका लागि तय भएको छ। महासंघको अध्यक्षमा शेखर गोल्छा विधानतः अध्यक्ष निश्चित भइसकेको छ। महासंघको विधानमा वरिष्ठ उपाध्यक्ष स्वतः अध्यक्ष हुने प्रावधान छ।
