कोरोनाको महामारीकै बेला राष्ट्रपतिको रात्रिभोज
राष्ट्रपति कार्यालयले आयोजना गरेको रात्रिभोजसहितको बैठकका लागि उपराष्ट्रपति नन्दबहादुर पुन, प्रधानमन्त्री केपी शर्मा ओली, विभिन्न राजनीतिक दलका शीर्ष नेता, नेकपाका स्थायी कमिटीसम्मका केही नेतालाई बोलाइएको छ ।
कांग्रेससहितका अन्य केहि दलका नेतालाई पनि शीतलनिवास बोलाइएको छ । नेपाली कांग्रेसका नेता रामचन्द्र पौडेलले राष्ट्रपति कार्यालयबाट निम्ता आएपनि जानेनजाने बारे टुंगो नभएको बताए । उनले भोज आयोजना गरिएको भन्दै निमन्त्रणा गरिएको जानकारी दिँदै यस्तो अवस्थामा जाने वा नजाने भन्ने विषयमा सल्लाह गरिरहेको बताए ।
यसअघिको स्थायी कमिटी बैठकको समयमा पनि राष्ट्रपति भण्डारीले नेकपा नेताहरुलाई दिवा भोज दिएर पार्टीको वैचारिक तथा गुटगत व्यवहारमा परिवर्तन ल्याउने प्रयास गरेकी थिइन ।
केहीदिन अघि नेकपा अध्यक्षद्वय केपी शर्मा ओली र पुष्पकमल दाहाल ‘प्रचण्ड’लाई छुट्टाछुट्टै भेटेकी राष्ट्रपति भण्डारीले सचिवालयका अन्य नेताहरुसँग पनि निरन्तर छलफल गरिरहेकी छन् । उनको सक्रियतालाई नेकपाका नेताहरुले ओली पक्षलाई बलियो बनाउने रणनीतिमा लिने गरेका छन् ।
आजैदेखि सुरू हुने नेकपाको स्थायी कमिटी बैठककै बेला बोलाइएको रात्रिभोजसहितको भेटघाटलाई अर्थपूर्ण रुपमा लिनुपर्ने नेताहरु बताउँछन् ।
