लकडाउनको बारेमा छलफल गर्न मन्त्रिपरिषद वैठक बस्दै
मन्त्रिपरिषद बैठक आज (बुधबार) बस्दै छ । प्रधानमन्त्री निवास बालुवाटारमा दिउँसो २ बजे बस्ने बैठकमा लकडाउनको आगामी रणनीतिका बारेमा छलफल हुने जनाइएको छ ।
कोरोना भाइरस संक्रमण रोकथाम तथा नियन्त्रणका लागि गत चैत ११ गतेदेखि नेपालभर लकडाउन गरिएको छ । लामो समयदेखिको लकडाउनले अधिकांशको जीविकोपार्जनमा समस्या भएपछि लकडाउनलाई क्रमशः खुकुलो बनाउने नीति सरकारले लिएको छ ।
कोरोना भाइरस रोकथाम तथा नियन्त्रण उच्चस्तरीय समितिले लकडाउन खुकुलो बनाउने प्रस्ताव मन्त्रिपरिषदमा बुझाइसकेको छ । दुई हप्ताको एक चरण गरी पाँच चरणमा लकडाउन क्रमशः खुकुलो बनाउने प्रस्ताव मन्त्रिपरिषदमा पुगेको छ ।
यसअघि कोरोना क्राइसिस म्यानेजमन्ट सेन्टर (सीसीएमसी) ले ६ चरणमा लकडाउन खुकुलो गर्ने गरी प्रस्ताव बुझाएको थियो ।
‘जर्जिया मोडल’ बारे बहस शुरु
लामो समयदेखिको लकडाउनले नागरिकको जनजीवन कष्टप्रद बनिरहँदा सरकार लकडाउनको यो र त्यो मोडलकै बसहमा अड्किरहेको छ । सरकारले पछिल्लो पटक थप गरेको लकडाउनको अवधि जेठ ३२ गते सकिंदैछ । असार १ गतेदेखि लागू हुने गरी सरकारले लकडाउनको अहिलेको स्वरूप बदल्न लागेको छ ।
कोभिड–१९ क्राइसिस म्यानेजमेन्ट सेन्टरले लडकाउन खुकुलो बनाउने पाँच चरणको मोडालिटी प्रस्तुत गरेको छ । यसलाई सीसीएमसीले ‘जर्जिया मोडल’ नाम दिएको छ । जर्जियाले दुई–दुई सातामा लकडाउनको स्वरूप परिवर्तन गर्दै जनजीवन सहज बनाइरहेको सीसीएमसी स्रोत बताउँछ । नेपालले पनि त्यही मोडालिटी अवलम्बन गर्दा उपयुक्त हुने निष्कर्ष निकालिएको सीसीएमसी उसको दावी छ ।
सीसीएमसीले तयार पारेको योजनामा असार १ गतेपछाडि आंशिक रूपमा हवाइ उडान शुरु गर्न प्रस्ताव गरिएको छ । पहिलो चरणमा कृषि उत्पादनसँग जोडिएका क्षेत्र खुकुलो बनाइनेछ । गृह र स्वास्थ्य मन्त्रालयको प्रोटोकल पालना गर्दै आंशिकरूपमा दूध, दुग्ध पदार्थ, तरकारी फलफूलको बिक्री वितरण शुरु गर्ने दिइने छ । सामाजिक दूरी कायम गर्दै खेतीपातीको काम पनि खुला गरिनेछ ।
त्यस्तै, दैनिक उपभोग्य सामग्री बिक्री वितरण गर्ने केन्द्रहरू, डिपार्टमेन्टल स्टोर, किराना पसल, खाद्य भण्डारण केन्द्र, पानी–ग्यास डिपोहरू पनि आंशिक रूपमा खुला गरिने सीसीएमसीको योजनामा छ ।
प्रथम चरणमा अत्यावश्यक बाहेकका सवारी साधन सञ्चालनमा भने पूर्णतः रोक लगाइने छ । यो चरण असार १ देखि १४ गतेसम्मको हुनेछ । दोस्रो तहमा अनलाइन मिडिया खुलाउन सकिने
शुरूवाती दुई साता केही सेवा प्रदायक संस्था खुकुलो पारेपछि त्यसको अनुभवका आधारमा लकडाउनको दोस्रो चरण लागु हुनेछ ।
१५ असारदेखि सम्पूर्ण स्वास्थ्य संस्था, अनलाइन मिडिया, राहत सहायता केन्द्रहरू खुला गर्न सकिने मोडालिटी सीएमसीले तयार पारेको छ । उक्त चरणमा जीमखाना, मर्निङ वाक, छापा सञ्चारमाध्यम, सरकारी, निजी कार्यालयहरू भने भने आंशिक रूपमा मात्रै खुला गरिनेछ । धार्मिक स्थल, खेलकुदसँग सम्बधित केन्द्र, ब्युटी पार्लर, सैलुन आदि भने त्यस तहमा पूर्णतः बन्द रहनेछन् ।
कोरोना संकट समाधानबारे कांग्रेसले प्रधानमन्त्रीसँग छलफल गर्ने
कोरोना नियन्त्रण तथा यसले जनजीवनमा सिर्जना गरेको संकट समाधानका विषयमा सुझाव दिन नेपाली कांग्रेसको प्रतिनिधमण्डलले आज (बुधबार) प्रधानमन्त्री केपी ओलीसँग भेटवार्ता गर्दैछ ।
यही जेठ २६ गते बसेको पार्टीको केन्द्रीय कार्यसमितिको बैठकको निर्णयअनुसार प्रधानमन्त्रीलाई भेटेर माथि उल्लिखित विषयमा ध्यानाकर्षण गराइने कांग्रेसका मुख्य सचिव कृष्णप्रसाद पौडेलले जानकारी दिएका छन् ।
वरिष्ठ नेता रामचन्द्र पौडेलको नेतृत्वमा कांग्रेसको प्रतिनिधिमण्डल प्रधानमन्त्री ओलीलाई भेट्न अहिले बिहान १० बजे प्रधानमन्त्री निवास बालुवाटार पुग्ने कार्यक्रम रहेको कांग्रेस पार्टी सचिवालयले जनाएको छ ।
