१५ हजार कोरोना संक्रमित पुग्न सक्ने स्वास्थ्यमन्त्री ढकालको अनुमान

 

स्वास्थ्यमन्त्री भानुभक्त ढकालले एक महिनामा नेपालमा १५ हजार कोरोना संक्रमितको संख्या पुग्न सक्ने अनुमानित तथ्यांकबारे खुलाएका छन् ।

बुधबार एकैदिन २०१ जना कोरोना संक्रमित थपिएसँगै नेपालमा कोरोना संक्रमितको संख्या २ हजार ३ सय पुगेका बेला उनको यो अनुमान मन्त्रालयको आन्तरिक प्रक्षेपणका आधारमा आएको विश्लेषण गरिएको छ ।

हाल स्वास्थ्य मन्त्रालय र विविध नीजि कम्पनी मार्फत पनि परिक्षणको दरमा वृद्धि भएका कारण यो अनुमानित तथ्यांक सार्वजनिक गरिएको हो । अर्कोचाहिँ भारतबाट नेपालमा अत्यधिक नागरिकको आगमन भएको र उनीहरूमा कोरोनाको संक्रमण धेरै देखिनु पनि आधार मानिएको हो ।

सरकारले के गर्नेछ ?

संक्रमितहरूलाई आइसोलेसन केन्द्र बनाएर राख्ने नीतिमा सरकार अघि बढेको मन्त्री ढकालले खुलाएका छन् । घरमै पनि आइसोलेसन कायम गरिने नीतिमा सरकार अगाडि बढेको छ ।

संक्रमितमध्ये ५ प्रतिशतलाई भेन्टिलेटरको आवश्यक पर्ने देखिएकाले सरकार त्यसको व्यवस्थापनको तयारी सरकारले गरकेो छ । स्वास्थ्य मन्त्रालयले गत महिना नै एक कार्यविधि तय गरेर संक्रमित संख्या दुई हजार नाघेमा लक्षण नदेखिएका संक्रमितलाई घरमै आइसोलेसनमा राख्ने जनाएको थियो । कार्यविधिमा संक्रमित संख्या दुईदेखि पाँच हजार पुग्दासम्म लक्षणविहीन संक्रमितलाई होम आइसोलेसनमा राखिने र लक्षण भएकाहरूलाई मात्र अस्पताल भर्ना गरिने भनिएको थियो । अहिले नेपालमा दैनिक ३ हजारको दरले परीक्षण भइरहेको छ । जसमा दैनिक औसत साढे दुई सय संक्रमित थपिएका छन् ।