डिजेल र मट्टितेलको मूल्य १० रुपैयाँ घट्यो
पेट्रोलियम पदार्थको मूल्य घटेको छ । पेट्रोल, डिजेल र मट्टितेलको मूल्य १०–१० रुपैयाँले घटेको हो । बुधबार बसेको नेपाल आयल निगमको सञ्चालक समितिको बैठकले १०–१० रुपैयाँ घटाउने निर्णय गरेको हो । अब पेट्रोल ९६ रुपैयाँ, डिजेल र मट्टितेलको मूल्य ८५ रुपैयाँ प्रतिलिटर भएको छ ।
काठमाडौंको लागि पेट्रोलको खुद्रा विक्री मूल्य ९६ रुपैयाँ कायम भएको छ भने र डिजेल र मटितेलको खुद्रा विक्री मूल्य ८५ रुपैयाँ प्रतिलिटरमा झरेको छ ।
आन्तरिक उडान तर्फको हवाई ईन्धन प्रतिलिटर १५रुपैयाँले घटेर ७५रुपैयाँ प्रतिलिटर मूल्य कायम भएको छ । यस्तै बाह्यतर्फ हवाई इन्धनको प्रतिलिटर मूल्य भने अमेरिकी डलर ०.९५ प्रतिलिटर कायम गरिएको निगमले जनाएको छ ।
एलपी ग्यासको हालको मूल्य यथावत नै राखिएको छ । विश्व बजारमा तेलको मूल्यमा आएको गिरावटसँगै इन्धनको मूल्यमा कटौती गरिएको निगमका प्रवक्ता विनितमणि उपाध्यायले बताए । अहिले विश्व बजारका कच्चा तेलको भाउ १८ वर्ष यताकै सस्तो छ ।
