एसईई परीक्षा केन्द्रमा हेल्थ डेस्क
देशभर यही चैत ६ गतेदेखि शुरु हुने एसईई परीक्षा केन्द्रमा हेल्थ डेस्क सञ्चालन हुने भएको छ ।
सरकारले एसईई परीक्षा केन्द्रमा हेल्थ डेस्क राख्न जिल्लास्थित परीक्षा समन्वय समितिलाई निर्देशन दिइसकेको छ ।
शिक्षा, विज्ञान तथा प्रविधि मन्त्री गिरिराजमणि पाखेरेल र स्वास्थ्य तथा जनसंख्या मन्त्री भानुभक्त ढकाल सहभागी बैठकले परीक्षा केन्द्रमा हेल्थ डेस्क स्थापना गर्ने र स्थानीय तहहरूमा स्वयम्सेवक परिचालन गर्ने निर्णय गरेको हो ।
शिक्षा मन्त्रालयका प्रवक्ता दीपक शर्माका अनुसार विश्वव्यापी रूपमा फैलिएको कोरानाभाइरसको संक्रमणबाट परीक्षार्थी प्रभावित हुनसक्ने भन्दै परीक्षा केन्द्रमा हेल्थ डेक्स स्थापना गर्न लागिएको हो ।
डेस्कमा भाइरसको लक्षण देखिएका विद्यार्थीले तुरून्तै जाँच गर्न सक्नेछन् ।
एसईई परीक्षा सञ्चालन र व्यवस्थापनका लागि प्रत्येक जिल्लामा प्रमुख जिल्ला अधिकारीको संयोजकत्वमा परीक्षा समन्वय समिति रहने व्यवस्था छ भने समितिले हेल्थ डेस्क स्थापना र सञ्चालन गर्ने प्रवक्त शर्माले जानकारी दिए ।
मुलुकभर १ हजार ९ सय ९४ परीक्षा केन्द्रमा एसईई परीक्षा सञ्चालन हुँदैछ । यसवर्ष ४ लाख ८२ हजार २ सय १९ परीक्षार्थी परीक्षामा सहभागी हुँदैछन् ।
