पक्राउ आदेश जारी भएपछि अस्पताल सञ्चालक दुर्गा प्रसाईं फरार
चिकित्सा शिक्षा आयोगका उपाध्यक्ष डा. श्रीकृष्ण गिरीले आफुसँग २० करोड घुस मागेको सार्वजनिक अभिब्यक्ति दिएका बी एण्ड सी अस्पतालका सञ्चालक दुर्गा प्रसाईलाई अदालतले पक्राउ अनुमति दिएको छ । गिरीले आफ्नो मानहानी गरेको भन्दै प्रसाईबिरुद्ध जिल्ला अदालत भक्तपुरमा मुद्दा दायर गरेका थिए ।
गिरीले मुद्दा दायर गरेपछि अदालतले उनलाई पक्राउको आदेश दिएको हो । तर पक्राउ आदेश जारी भएलगतै प्रसाई फरार भएका छन् । केही दिनअघिसम्म गिरीबिरुद्ध उजुरी लिएर उनी अख्तियार दुरुपयोग अनुसन्धान आयोगमा पुगेका थिए । आयोगमा उनले गिरी बिरुद्ध भ्रष्टाचारको उजुरी दायर पनि गरेका थिए ।
भक्तपुर जिल्ला अदालतको आदेश पाएपछि प्रहरी पक्राउ गर्न उनको निवासमा पुगेको थियो । तर प्रसाईँ त्यहाँबाट भागिसकेको प्रहरीले जनाएको छ ।
