महरा परिवारले छाड्यो बालुवाटार, कतै डेरा नपाएपछि आफन्तकोमा शरण
यौनदुराचारको आरोपमा निवर्तमान सभामुख कृष्णबहादुर महरा पक्राउ परेपछि उनको परिवारले काठमाडौंमा भनेजस्तो डेरा पाएन । बालुवाटारस्थित सभामुखको सरकारी निवासबाट असोज १९ गते महरा पक्राउपरेका थिए । त्यसपछि महरा परिवारले सरकारी निवास छाडेको छ । तर, भनेजस्तो डेरा नपाएपछि पारिवारिक सदस्य बाँडिएर बसेका छन् ।
सरकारी निवास छाडेपछि परिवार अट्ने ठूलो घर फेला नपरेपछि महराको पारिवारका सदस्यहरु बाँडिएर बसेका हुन् । महराका परिवारका सदस्य अहिले धोविघाट र लाजिम्पाटमा बसेका छन् । महरा पत्नी सीता धोबीघाटमा र उनीहरुका छोराछोरी लाजिम्पाटसहित आफन्तकोमा बस्दै आएका छन् । परिवार ठूलो भएकाले नयाँ घरको खोजी भइरहेको बताइएको छ ।
गएको असोज १२ गते महरामाथि यौनदुराचाराकोआरोप लगाएकी संसद सचिवालयकी कर्मचारी रोशनी शाहीले असोज १८ गते किटानी उजुरी दिएपछि निवर्तमान सभामुख महरा असोज १९ गते सरकारी निवासबाट पक्राउपरेका थिए । महराले असोज १४ गते सभामुख पदबाट राजीनामा दिएका थिए ।
न्यायिक हिरासतमा रहेका महराको आइतबारबाट सरकारी वकिलको कार्यालयमा बयान लिन सुरु गरिएको छ भने उनलाई जिल्ला अदालत काठमाडौंले पाँच दिन हिरासतमा राखेर अनुसन्धान गर्न प्रहरीले अनुमति दिएको छ । सरकारी वकिलसमक्ष इन्कारी बयान दिएका महरा अस्वस्थ भएपछि नर्भिक अस्पतालमा उपचाररत छन्।
