वैदेशिक रोजगार बोर्डले वैदेशिक रोजगारीमा जान चाहने युवालाई निःशुल्क सीपमू्लक तालिम प्रदान गर्ने भएको छ । बोर्डले चालु आर्थिक वर्षभित्र १५ हजार युवालाई सीपमूलक तालिम दिने तयारी गरिरहेको जानकारी दिएको छ ।
तालिम सञ्चालनका लागि श्रम, रोजगार तथा सामाजिक सुरक्षा मन्त्रालयमार्फत २५ करोड रुपैयाँ विनियोजन गरेको बोर्डले जानकारी दिएको छ । बोर्डले १९ वटा क्षेत्रमा निःशुल्क तालिम दिने भएको हो ।
गार्मेन्ट मेसिन अपरेटर, सुरक्षा गार्ड, इलेक्ट्रिसियन, कार्पेन्ट्री, एसिस्टेन्ट स्काफोल्डर, हाउस पेन्टर, हाउस किपिङ एटेन्डेन्ट, कुक, वेटर, स्टिलफिक्सर, प्लम्बर सहायक र बेन्डरलगायत क्षेत्रमा सीपमूलक तालिम सञ्चालन गरिने बोर्डको भनाइ छ ।
तालिम आगामी मंसिर महिनादेखि सञ्चालन गर्नका लागि छलफल र तयारी भइरहेको बोर्डका कार्यकारी निर्देशक राजन श्रेष्ठले जानकारी दिए । बोर्डले चालु आर्थिक वर्षभित्र ३० हजार युवालाई सीपमूलक तालिम सञ्चालन गर्न लागेको जनाएको छ ।
तालिम लिन इच्छुकले सहभागिता जनाउन सक्ने उनको भनाइ छ । वैदेशिक रोजगार विभागले सूचीकृत गरेका तालिम केन्द्रबाट सीप तालिम सञ्चालन गरिने बोर्डले जनाएको छ । तालिम काठमाडौंलगायत बुटवल, सुनसरी, झापा, पोखरा र जनकपुरमा समेत सञ्चालन गरिने बोर्डले जानकारी दिएको छ ।
अर्को वर्षदेखि बजेट तथा तालिमका विषय पनि थप गर्दै लगिने बताए । उनका अनुसार तालिम आगामी मंसिरदेखि सुरु हुनेछ । बोर्डले युवालाई ३० दिने सीपमूलक तालिम प्रदान गर्नेछ । तालिममा इच्छुक जो कोही युवा सहभागी हुन सक्नेछन् । तर, प्राप्त आवेदनबाट बोर्डले योग्यता पूरा गरेकालाई मात्रै छनोट गर्नेछ ।
