घरभित्र भतिजोसँग भिडियो गेम खेलिरहेकी २८ वर्षे महिलालाई पुलिसले गोली हान्दा मृत्यु
टेक्सस पुलिसले शनिबार बिहान एक अश्वेत महिलालाई उनको घरभित्रै गोली हानेको छ । गोली लागेका कारण महिलाको मृत्यु भएको छ ।
महिलाको सुरक्षाको अनुसन्धानका लागि पुलिस बोलाइएको बताइएको छ ।
२८ वर्षीया अटाटेना जेफरसन आफ्ना आठ वर्षीय भतिजोसँग टेक्ससको फोर्ट वर्थमा आफ्नो घरमा थिइन् ।
एक छिमेकीले दिएको जानकारी अनुसार राती जेफरसनको घरको ढोका खुल्ला देखेपछि एक छिमेकीले पुलिसलाई फोन गरेका थिए ।
पुलिसले घटनाको बडिक्याम फुटेज जारी गरेको छ जसमा एक पुलिस अधिकारी जेफरसनलाई देखेको केही सेकेन्डपछि नै गोली चलाएको देखिएका छन् ।
भिडियोमा देखिए अनुसार पुलिस अधिकारी सुरुमा जेफरसनको घरको पूरा चक्कर लगाइरहेका छन् र त्यसपछि उनले ढोकामा एउटा आकृति आइरहेको देख्छन् । पुलिस अधिकारीले ढोकामा देखिएका व्यक्तिलाई हात उठाउन भन्छन् र ढोकामा उभिएका व्यक्तिले हात उठाउँछन् । त्यसपछि पुलिस अधिकारीले ढोकाको सिसाको वारपार गोली चलाउँछन् ।
फोर्ट वर्थ पुलिस विभागले एक बयान जारी गर्दै श्वेत अधिकारीलाई खतराको आभाष भएपछि उनले आफ्नो हतियार निकालेको बताएको छ ।
अधिकारीका अनुसार गोली चलाउने ती पुलिसलाई छुट्टिमा पठाइएको छ र उनीमाथि अनुसन्धान भइरहेको छ ।
गोली चलाएको यो घटना शनिबार बिहान स्थानीय समयानुसार करिब साढे दुई बजेको हो ।
यद्यपि, बडिक्यामको जुन फुटेज जारी गरिएको छ त्यो एडिट गरिएको छ । बडिक्याम फुटेजबाट यस्तो भान हुन्छ कि जो अधिकारी भिडियोमा देखिएका छन् उनले आफूलाई पुलिस अधिकारीको रुपमा चिनाएका छैनन् ।
घरभित्रको फुटेज उपलब्ध छैन तर पुलिसले एक हतियारको तस्बिर जारी गरेको छ जुन बेडरुम भित्र भेटिएको बताइएको छ ।
टेक्ससमा १८ वर्ष माथि उमेर भएकाले कानूनी रुपमा हतियार राख्न सक्छन् तर जेफरसनले घटना हुँदा कुनै हतियार लिएकी थिइन् थिइनन् भनेर स्पष्ट हुन सकेको छैन ।
पुलिसका अनुसार घटनास्थलमा जेफरसनलाई इमर्जेन्सी मेडिकल सुविधा प्रदान गराइएको थियो तर उनलाई मृत घोषित गरिएको छ ।
‘भिडियो गेम खेल्नु’
जेफरसनको परिवारको प्रतिनिधित्व गरिरहेका वकिलका अनुसार जब जेफरन ढोका नजिकैबाट आइरहेको आवाजबारे थाहा पाउन जब त्यता लागिन् तब उनी भतिजोसँग भिडियो गेम खेलिरहेकी थिइन् ।
वकिल ली मेरिटले फेसबुकमा लेखे, ‘उनकी आमा बिरामी भएी थिइन् त्यसकारण उनी घरको रेखदेख गरिरहेकी थिइन् ।’
उनले लेखे, ‘उनको हत्याको कुनै कारण थिएन् । हामीले न्याय पाउनुपर्छ ।’
उनका अनुसार जेफरसनले एक विश्वविद्यालयबाट स्नातकको डिग्री लिएकी थिइन् र मेडिकल उपकरण बिक्रिको काम गरिरहेकी थिइन् ।
यो घटनाको दुई हप्ता अघि एक अश्वेत व्यक्ति बोथन जीनलाई डलासमा उनकै घरमा गोली हानी हत्या गरेका कारण एक अफ–ड्युटी अधिकारीलाई सजाय सुनाइएको थियो ।
