प्रधानमन्त्री ओलीले भने सडकमा बेसहारा देखे सरकारलाई खबर गर्नु
प्रधानमन्त्रीले प्रदेशका प्रमुख र मुख्यमन्त्रीको सम्पर्क कार्यालय र निवासको सोमबार सैंबु आवास क्षेत्र भैँसेपाटीमा शिलान्यास गरेका छन् । २७ रोपनी १२ आनामा ९७ करोड ११ लाख लागतमा दुई वर्षभित्र भव्य भवन निर्माण हुने सहरी विकास तथा भवन निर्माण विभागले जनाएको छ । केसी समान्तर जेभीले ठेक्का लिएको स्थलमा सात प्रदेशका लागि सात ब्लक र प्रत्येक ब्लकमा तीन–तीनतले दुई भवन गरी १४ अत्याधुनिक र सुविधासम्पन्न भवन बन्नेछ ।
प्रधानमन्त्री केपी शर्मा ओलीले सरकार पूर्वाधार र विकासका हरेक क्षेत्रमा तीव्र विकास गर्दै समृद्ध नेपालको परिकल्पनाका साथ अघि बढेको बताए । उनले लोककल्याणकारी राज्यको स्थापना गर्दै कोही पनि नागरिक भोकै मर्न नपरोस् भन्नका लागि गरिबी लक्षित कार्यक्रमको अनुदानलाई बिचौलियाले खाने प्रवृत्तिमा सुधारेर लक्षित वर्गमा पु¥याइने बताए ।
‘हामी देखिने गरी सामाजिक रूपान्तरण र परिवर्तनको दिशामा छौं । अब कोही पनि बेसहारा भएर सडकमा रहनुपर्दैन । त्यस्ता कोही अलपत्र नागरिक देखिए सरकारलाई खबर गर्नुहोला’, उनले भने, ‘हरेक दिन नेपाल एक कदम अगाडिको नारा मैले दिएको छु । ठेकेदार भागेका कारण ढिलाइ भएको मेलम्ची आयोजना अब छिट्टै सम्पन्न हुनेछ । गैरमुद्दालाई मुद्दा बनाएर विरोध गर्नेहरु थाक्लान् तर सरकार आफ्नो बाटोमा अडिग रहनेछ ।’
सहरी विकासमन्त्री मोहम्मद इस्तियाक राईले सो भवन निर्माणमा पारदर्शिता र गुणस्तरीयता अपनाइने प्रतिबद्धता व्यक्त गरे । प्रधानमन्त्री ओली नेतृत्वको सरकारले सुरु गरेको सघन तराई कार्यक्रमबाट तराईका हरेक जिल्ला सदरमुकाममा मुहार परिवर्तन भएको उनको भनाइ थियो ।
