प्रभु साहले दिए प्रदेश अध्यक्षबाट राजीनामा
पार्टी शीर्ष नेताको कार्यशैलीप्रति असन्तुष्टी जनाउँदै नेकपा प्रदेश नम्वर २ का अध्यक्ष प्रभु साहले पदबाट राजीनामा दिएका छन् । पार्टी अध्यक्ष पुष्पकमल दाहाल प्रचण्डको कार्यशैलीबाट आजित बनेका साहले मंगलबार विहान प्रचण्डलाई नै राजीनामा बुझाएका छन् ।
साह पूर्वमाओवादीभित्र मधेश क्षेत्रका प्रभावशाली नेता हुन् । तर पछिल्लो समय अध्यक्ष दाहालले उनलाई उपेक्षा गर्दै आएका थिए । उनीभन्दा जुनियरलाई पार्टीको स्थायी कमिटी सदस्य बनाइएको छ भने उनलाई प्रदेश अध्यक्षमा सिमित गरिएको थियो । पार्टी स्थायी कमिटीमा नपरेपछि उनी असन्तुष्ट बनेका थिए । साहलाई स्थायी कमिटीमा ल्याउन प्रयासा भएपनि अन्तिम समयमा स्थायी समितको सूचिबाट नाम हटाइएको थियो । त्यो बेला पार्टी एकीकरणलाई सार्थक बनाउन आफु मौन बसेको प्रतिक्रिया दिएका छन् ।
साहलाई प्रदेश अध्यक्ष बनाएपनि भूमिका विहीन बनाइएको थियो । प्रदेश कमिटीदेखि जिल्ला कमिटी चयनसम्म उनलाई थाहा नै नदिई अध्यक्ष प्रचण्ड आफैले नाम तय गरेका थिए । प्रदेश सदस्यहरुको चयन गरिँदा अध्यक्ष साहसँग सल्लाह नगरी पार्टी सदस्य नभएकालाई समेत प्रदेश सदस्य बनाइएको भन्दै उनले असन्तुष्टी पोखेका छन् ।
‘पार्टीको माथिल्लो निकायको गलत निर्णय र निर्देशनका कारण काम गर्ने वातावरण भएन’ साहले छोटो प्रतिक्रिया दिँदै भने ‘प्रदेश अध्यक्षको रुपमा मैले अगाडि बढाएका हरेक काममा नेतृत्व तहबाटै असहयोग र चौतर्फी घेराबन्दी भयो । मैले राजीनामा दिँए ।’ जिल्ला कमिटी चयनपछि साहले प्रदेशभर प्रशिक्षण चलाउन खोजेका थिए । तर अन्तिम समयमा प्रचण्डले प्रशिक्षण रोको थिए ।
