ओलीसँग प्रचण्डले गरे आत्मसमर्पण
आइतवार बसेको नेपाल कम्युनिस्ट पार्टी (नेकपा) को सचिवालय बैठकमा अध्यक्ष केपी शर्मा ओली र नेता माधव नेपालबीच चर्काचर्की भएको छ । बैठकमा नेपालले अध्यक्ष वा प्रधानमन्त्री मध्ये एक पद छोड्न ओलीलाई आग्रह गरेका थिए । ओलीलाई अध्यक्ष पद छोडेर प्रधानमन्त्री मात्र बन्न प्रस्ताव गरेका थिए । तर नेपालको प्रस्तावमा अर्का अध्यक्ष पुष्पकमल दाहाल प्रचण्डले साथ दिएनन् ।
सार्वजनिक कार्यक्रममा दुई मध्ये एक पद आफुले पाउनु पर्ने दावी गर्दै आएका प्रचण्ड आइतवारको बैठकमा गरुडका अगाडी सर्प बनेका छन् । प्रचण्ड आफ्नो अडानबाट पछि मात्र हटेका छैनन् आफ्नो अस्थिर चरित्र फेरी एकपटक नेकपाको सचिवालय बैठकमा देखाएका छन् । प्रचण्डले दुबै पदमा ओलीलाई समर्थन गरेका छन् ।
नेपालले प्रधानमन्त्री ओलीलाई अध्यक्ष पद छाड्नु पर्ने प्रस्ताव गरेका थिए । एउटै व्यक्ति प्रधानमन्त्री र अध्यक्ष दुबै पद लिन नहुने तर्क गर्दै नेपालले भनेका थिए ‘सरकार तपाई चलाउनुस्, पार्टी प्रचण्डले चलाउनुहुन्छ ।’ तर नेपालको प्रस्तावमा ओली मात्र नभई प्रचण्ड पनि तयार भएनन् । नेपालको प्रस्तावमा ओलीले भने अध्यक्ष पनि छाड्दिँन, सरकारपनि छाड्दिन । ओलीको जवाफ लगतै प्रचण्डले दुवै पदमा ओलीलाई समर्थन जनाए । उहाँको रुचिको कुरा हो हामीले निर्णय गरेर हुँदैन, प्रचण्डले भने ।
नेता नेपालले दुई अध्यक्षको कार्यविभाजनमा अडान लिइरहेका बेला प्रचण्ड एकल अध्यक्ष बन्ने अस्वीकार गरे । आफुलाई ओलीसँग समर्पित गरेको नेकपाका एक सचिवालय सदस्यले बताए । पछिल्लो समय अध्यक्ष प्रचण्ड, नेता झलनाथ खनाल र बामदेव गौतमले साथ छोडेपछि सचिवालय बैठकमा नेपाल एक्लिएका छन् ।
बैठकको शुरुमै अध्यक्ष ओलीले नेता नेपालमाथी आक्रमण गरेका थिए । नेपालको बरिष्ठता खोस्दै खनाललाई बरिष्ठ बनाएका थिए । जवाफमा नेपालले पार्टी एकताका बेला खनालसँग रिरिवी साँधन आफुलाई बरिष्ठ बनाएको र अहिले आफुसँग रिसिवी साँध्न खनाललाई बरिष्ठ बनाएको आक्रोस पोखेका थिए । नेपालले पूर्वएमालेभित्रका जुनियर नेतालाई सचिवालयमा राख्ने तर सिनियर नेतालाई बाहिर राख्ने काम ठिक नभएको पनि बताएका थिए । पूर्व एमालेमा इश्वर पोखरेल र महासचिव बिष्णु पौडेलभन्दा भीम रावल, अष्टलक्ष्मी शाक्य, युवराज ज्ञवाली बरियतामा अघि थिए । तर एकतापछि उनीहरु बरियतामा पछि परेका छन् । उनीहरु तीन जनालाई पनि सचिवालय सदस्य बनाउनु पर्ने माग नेता नेपालले राखेका थिए ।
