म मन्त्री बनें, खुसीले झाँक्रीजी रुनुभयो : मन्त्री योगेश भट्टराई
नवनियुक्त पर्यटनमन्त्री योगेश भट्टराईप्रति भरोसा व्यक्त गर्दै बधाई दिन आउने शुभेच्छुकको शुक्रबार भीड थियो । प्रदेश ५ का मुख्यमन्त्री शंकर पोखरेल मन्त्रीको कार्यकक्षबाट बाहिरिएको १५ मिनेटपछि सांसद रामकुमारी झाँक्रीसहितको टोली भित्रियो । भट्टराईसँग लामो राजनीतिक यात्रा गरेका नेकपा केन्द्रीय सदस्य ठाकुर गैरेलगायत पूर्वएमाले अखिलका दर्जन नेता उक्त टोलीमा सिंहदरबार पुगेका थिए ।
त्यही बेला मन्त्री भट्टराईले भने, ‘कसैले मलाई एउटा अनलाइनको समाचार देखायो । म मन्त्री बनेपछि रामकुमारी झाँझी रुँदै गरेको तस्बिर राखिएको रहेछ । मैले पनि खुसी भएर रुनुभयो होला भनिदिएँ ।’ नेकपा स्थायी कमिटी सदस्य भट्टराई मन्त्री बनेलगत्तै झाँक्रीले सामाजिक सञ्जालमा ‘योगेश दाइ भुंग्रोमा पर्नुभयो’ भन्ने प्रतिक्रिया जनाएकी थिइन् ।
त्यही प्रतिक्रियालाई आधार बनाएर केही अनलाइनले झाँक्री रुँदै गरेको तस्बिर राखेका रहेछन् । उनीसहितका नेता सिंहदरबारस्थित संस्कृति, पर्यटन तथा नागरिक उड्डयन मन्त्रालय पुग्दा त्यसकै चर्चा चलेको थियो । मन्त्री भट्टराईले आफूलाई पहिलेजस्तै सहयोग गर्न पूर्वअखिलका नेताहरूलाई आग्रह गरे ।
पार्टीभित्रको गुटले गर्दा मुख्यमन्त्री पोखरेल र मन्त्री भट्टराईबीचको सम्बन्ध भने सुमधुर छैन । सम्बन्ध बिग्रिएको पनि होइन । प्रधानमन्त्री तथा मन्त्रिपरिषद् कार्यालयमा मात्र जाने पोखरेल शुक्रबार पत्नी तथा सांसद सुजिता शाक्यसहित पर्यटन मन्त्रालय पुगेका हुन् ।
भट्टराईलाई सामाजिक सञ्जालमार्फत बधाईको ओइरो लागेको छ । सिंहदरबारस्थित कार्यकक्षमा शुभेच्छुकको भीड उस्तै छ । संघीय सांसद, प्रदेशका मन्त्रीदेखि पार्टीका केन्द्रीय सदस्य लस्करै लागेर मन्त्रालय पुग्ने गरेका छन् । केही जिल्लाबाट माला बोकेर कार्यकर्ता बधाई दिन संघीय राजधानी काठमाडौं आइपुगेका छन् । शुभेच्छुकको भीडले मन्त्री भट्टराई घेरिएका छन् । प्रधानमन्त्रीदेखि अन्य मन्त्रीभन्दा भट्टराईको कार्यकक्षमा भीडभाड छ । उनले यो मन्त्रालयका विषयमा राम्ररी अध्ययन गर्न पाएका छैनन् ।
विश्वविद्यालयका अध्यापकदेखि क्याम्पसका विद्यार्थी, पर्यटन व्यवसायीदेखि अन्य मन्त्रालयका कर्मचारीसमेत बधाई दिन पुग्ने गरेका छन् । नेकपाका प्रायः नेताले सामाजिक सञ्जालमार्फत बधाई दिएका छन् । कांग्रेस नेता गगन थापाले पनि ‘दाइ’ भन्दै बधाई दिएका छन् । भट्टराई असफल भए आफ्नो पुस्ताको राजनीतिक भविष्य असफल हुने नेता थापाको भनाइ छ ।
