एसएसपीको छोरीको विवाहमा ठेकेदारको लर्को
असारको अन्तिममा नेपाल प्रहरीमा सामान आपूर्ति गर्ने ठेकेदारहरुका लागि दौडधूप चल्ने गर्दछ । गुणस्तर टेष्ट गर्न पठाउनेदेखि टेष्ट भएका सामानहरु बुझाउनका लागि ठेकेदारहरु लागेका हुन्छन् । सामान पास नहुने हो कि भन्ने त्राहीमाम ठेकेदारहरुलाई हुन्छ । प्रहरी प्रधान कार्यालयको प्रबन्धदेखि आर्थिक प्रशासन महाशाखाका हाकिमहरुलाई खुसी बनाउन उनीहरु रातदिन लाग्ने गर्दछन् । यसरी ठेकेदारहरुको दौडधूप चलेकै समयमा आर्थिक महाशाखाका प्रमुख एसएसपी दीपक थापाले छोरीको विवाह कार्यक्रम सम्पन्न गरेका छन् । २०७६ असार १६ मा एसएसपी थापाको छोरीको विवाह थियो ।
विवाह भोज गैरीधाराको एलिस पार्टी प्यालेसमा थियो । उक्त भोजमा ठेकेदारहरुबाट राम्रै सहयोग उठाइएको प्रहरी स्रोतको दाबी छ । स्रोतका अनुसार करिब १४ सय निम्तालु सहभागी उक्त भोजमा ब्ल्याकलेबल, वाइनदेखि सबै पेय पदार्थ राखिएको थियो । प्रतिप्लेट १८ सय रुपैयाँमा निम्तालुका लागि खानाको ब्यवस्था गरेका थापाको भोजमा प्रहरीमा डीएमएस बुटदेखि चुस्ताको ठेक्का पाएका ज्ञानेन्द्र बस्नेतदेखि टोपेन्द्र बीसीसम्म सहभागी थिए ।
राजमान मिश्र, रितेश अग्रवाल, पिताम्बर मुन्का, वीरेन्द्र जोशी लगायतका ठेकेदारहरु पनि विवाह भोजमा निम्तालु थिए । आर्थिक प्रशासन महाशाखाको प्रमुख गुणस्तर हेर्ने कमिटीको संयोजक पनि हुने भएकाले थापाको छोरीको विवाहमा ठेकेदारहरुले मन फुकाएरै सहयोग गरेका थिए । असार १५ मै सामान बुझाउने अन्तिम समय हो । सामान बुझाएर भुक्तानी हुने दिन भएकाले पनि ठेकेदारहरुले आर्थिक प्रशासनका एसएसपीका छोरीको विवाहमा राम्रो सहयोग गरेका थिए । यसअघि आर्थिक प्रशासन महाशाखा प्रमुख हुँदा एसएसपी पवन खरेलले पनि छोरीको विवाह गरी ठेकेदारहरुबाट सहयोग लिएको चर्चा भएको थियो । वर्तमान एसएसपी थापाले पनि खरेल पथ अनुशरण गरी मौकाको सदुपयोग गरेका छन् ।
नेपाल प्रहरीको भण्डार शाखाले केही ठेकेदारहरुलाई सामान पूरा नबुझाउँदै गुणस्तर परीक्षणका लागि पठाएको छ । नेपाल प्रहरीले गुणस्तर टेष्टका लागि भारतमा पठाउने गर्दछ । त्यसमा ३ वटा सामान पूरा नबुझाएका कम्पनी पनि छन् । आर्थिक प्रशासन महाशाखाका एसएसपी थापा निकट कम्पनी हुन् भन्दै भण्डार शाखाले गुणस्तर टेष्ट गर्न पठाएको छ । जबकि सामान पूरा नबुझाई गुणस्तर टेष्ट गर्न पठाइँदैन । गुणस्तर हेर्ने कमिटीको आर्थिक प्रशासन महाशाखाका प्रमुख संयोजक हुन्छन् । उनले पूरा सामान नबुझाइकन आर्थिक बर्षको अन्तिममा भुक्तानी दिएका छन् ।
गुणस्तरको मामलामा आर्थिक प्रशासन प्रमुख उत्तम कार्की कानुन बमोजिम गर्ने भनेर चिनिन्छन् । उनी आर्थिक प्रशासन महाशाखा प्रमुख हुँदा तत्कालीन आइजीपी उपेन्द्रकान्त अर्यालले दिएको दबाबसमेत अस्वीकार गरेका थिए । नेपाल प्रहरीको प्रबन्धमा बसेर इन्स्पेक्टरबाट अवकाशपछि ठेक्कापट्टामा लागेका खिला केसीको २२ हजार जोर डीएमएस बुट गुणस्तर फेल भएपछि अर्यालले खिलाको कुरामा ‘पोजेटिभ भइदेऊ’ भन्दा पनि उनले अस्वीकार गरेका थिए ।
खिला केसीले तत्कालीन अख्तियार आयुक्त दीप बस्नेतमार्फत् आइजीपी अर्याललाई दबाब दिएका थिए । बस्नेत खिला केसीका नातेदार थिए । तर एसएसपी कार्कीले त्यतिबेलाका आइजीपी अर्याललाई ‘केसीको फेल भएको डीएमएस बुटको भुक्तानी दिए मलाई मात्र होइन, तपाईलाई पनि हत्कडी लाग्छ’ भनेर प्रतिवाद गरेका थिए । पछि केसीको कम्पनी कालोसूचीमा प¥यो । टोपेन्द्र बीसीको ३ हजार थान स्लीपीङ ब्याग गुणस्तर फेल हुँदा नेपाली कांग्रेस सुर्खेतका नेता हृदयराम थानीदेखि विभिन्न शक्तिकेन्द्रबाट दिएको दबाब पनि कार्कीले सुनेका थिएनन् ।
