मदिरा नबेच्नेलाई सरकारले दिने भयो १ लाख २० हजार पुरस्कार
नेपालमा अहिले मदिराको कुरा खुबै चर्चामा रहेको छ । संसदमा मदिरा सेवन गर्नको लागि उमेर र स्थान तोक्नुपर्ने बहस भइरहेको छ । यो बीचमा बैतडीको दोगडाकेदार गाउँपालिकाले रक्सी बेच्न छाड्ने व्यवसायीलाई १ लाख २० हजार पुरस्कार दिने भएको छ । गाउँपालिकाको सार्वजनिक सुनुवाइ कार्यक्रममा गाउँ कार्यपालिकाले रक्सी बेच्न छोड्ने व्यवसायीलाइ १ लाख रकमको पुरस्कार दिने निर्णय गरेको हो ।
गाउँपालिकाभित्रका जोसुकै रक्सी व्यापारीले रक्सीको कारोबार गर्दिनँ भनेर मदिरा बिक्री वितरण अनुमति पत्र बुझाएमा गाउँपालिकाका तर्फबाट १ लाख र आफ्नो व्यक्तिगत तर्फबाट २० हजार रकम थप गरेर जम्मा एक लाख २० हजार दिइने गाउँपालिका उपाध्यक्ष पार्वती कार्कीले बताउनुभयो । रक्सीले गर्दा गाँउघरमा महिला हिंसाका घटनाहरु बढेकाले हिंसा न्यूनीकरणका लागि गाउँपालिकाले यस्तो निर्णय गरेको उहाँले प्रष्ट पार्नुभयो ।
रक्सीका कारण आफ्नै पतिबाट हिसांमा परेको कुरा लिएर स्थानीय महिलाहरु आफूकहाँ आउने गरेको र आफूले सम्झाउँदा पनि नमान्ने गरेकोले निकै समस्या भइरहेको उहाँले बताउनुभयो । न्यायिक समिति संयोजक भएकाले यस्ता घटनाहरु मिलाउने जिम्मेवारी भए पनि आफूलाई निकै सकस भएको उहाँले गुनासो गर्नुभयो ।
गाउँपालिकाले दिने १ लाख २० हजारले नास्ता पसल, मासु पसललगायत अन्य व्यवसाय सञ्चालन गर्न सकिने भएकाले यस्तो निर्णय गरेको बताइएको छ । दोगडाकेदारमा गाउँपालिकामा अरु पसलभन्दा पनि रक्सी पसल बढी रहेको बताइएको छ ।
