नेपाली भुमिमा भारतले प्रहरी चौकी बनायो
रूपन्देही जिल्लास्थित दुई देशकाबीचमा रहने दशगजा क्षेत्र अतिक्रमण गरी भारतले प्रहरी चौकी निर्माण गरेको छ । नेपाल–भारत सीमा क्षेत्रको सीमा स्तम्भबाट नेपालतर्फ २१ फिट जग्गा रहेको छ । सीमा क्षेत्रको दशगजाको ३० फिट सीमामा संरचना निर्माण गर्न पाइँदैन । सो मान्यता विपरीत भारतले प्रहरी चौकी निर्माण गरेको हो ।
भारतले प्रहरी चौकी नै निर्माण गरेपछि जमिनको स्वामित्व सम्बन्धी विवाद सिर्जना भएको छ । नेपालको सडक विस्तारका क्रममा केही सरकारी कार्यालय भत्काउने क्रममा भारतले दशगजामा नै संरचना निर्माण गरेको पाइएको हो ।
सीमा मिचिएको बारेमा भैरहवावासीले सो क्षेत्रका प्रतिनिधि सभा सदस्य घनश्याम भुसाललाई जानकारी गराएपछि सांसद भुसालले बिहीबार दशगजा क्षेत्रको निरीक्षण गरेका छन् ।
दशगजा मिचिएको थाहा भएपछि स्थानीयको सक्रियतामा सांसद भुसालकै उपस्थितिमा जिल्लास्थित नापी कार्यालय, जिल्ला प्रशासन र सीमा सुरक्षा गणका प्रतिनिधिकाे रोहबरमा नेपालको छुटेको जमिनको नापजाँच गरिएको छ ।
