भाग्य पनि कस्तो–कस्तो ? भएका तीन सन्तान नदीले बगाएपछि शोकमा दम्पती !
कुनै पनि आमाबाबुका लागि सन्तान धेरै प्यारो हुन्छ । हरेक आमाबाबुले आफ्ना सन्तानका लागि धेरै कुराहरु त्याग गर्न सक्छन् । यो बीचमा एउटा दुःखद खबर आएको छ । धनकुटा नगरपालिका–८ का शंखबहादुर राई तीन जना छोराछोरी तमोर नदीले बगाएपछि सन्तानविहीन बन्नुभएको छ । गएको आइतबार पौडी खेल्ने क्रममा शंखबहादुरको ९ वर्षका छोरा सन्दीप राई, ७ वर्षकी छोरी सलिना राई र ४ वर्षीया छोरी संजिला राईलाई तमोर नदीले बगाएको थियो ।
घटना गएको आइतबार को भए पनि प्रहरीले साउन ७ गते साँझ मात्र खबर पाएको थियो । घटनाको जानकारी पाएपछि जिल्ला प्रहरी कार्यालय धनकुटाबाट प्रहरी निरीक्षक डम्बरबहादुर थापाको नेतृत्वमा बुधबार बिहान प्रहरीको टोली घटनास्थल गएको थियो । घटनास्थल पुगेर स्थानीयबासीन्दाको सहयोगमा दिनभर नदीले बगाएका बालबालिकाहरुको खोजी गरे पनि फेला पार्न नसकिएको जिल्ला प्रहरी कार्यालय धनकुटाका प्रहरी उपरीक्षक सुदर्शनप्रसाद कोइरालाले जानकारी दिनुभयो ।
याक्चना घाट नजिकै रहेको साहुको खेत अधियाँमा कमाउँदै आउनुभएका शंखबहादुरले विद्यालय बिदा भएका कारण छोराछोरीलाई पनि सँगै खेतमा लिएर जानुभएको थियो । बुबाआमा खेतमा काम गर्न थालेपछि बालबालिकाहरु गोरु चराउँदै नदीमा खेल्न गएको बेला उनीहरु तीनै जनालाई बगाएको हो । सबैभन्दा पहिला कान्छी छोरीलाई नदीले बगाएको थियो । उनलाई बचाउन खोज्दा जेठी छोरीलाई पनि खोलाले बगायो । दुबै जना बहिनीलाई खोलाले बगाएपछि उद्धार गर्न गएका दाजु सन्दीप पनि खोलाले बगाएको बताइएको छ ।
