अस्पतालको बेवास्ताका कारण बिरामीको ज्यान गएको भन्दै आफन्तको प्रदर्शन

हाम्रो इकोनोमि

 

अस्पतालका कारण बिरामीको मृत्यु भएको भन्दै प्रदर्शन थालिएको छ । त्रिशुली अस्पतालको लापरबाहीले सुत्केरीको मृत्यु भएको भन्दै नुवाकोट बेल्कोट्गढी ७ महादेव फाँटका स्थानीयले गल्छी–त्रिशुली सडक बन्द गरेका हुन् । शुक्रबार बिहानै देखि स्थानीयले मृतक महिलाको घर नजिकैको सडकमा टायर बालेर सडकअवरुद्ध गरेका हुन । बिहीबार ३५ वर्षीया गोमा वस्ती अस्पतालमा सुत्केरी भएकी थिइन् ।

अस्पतालले शिशुलाई थप उपचारका लागि काठमाडौं पठाए पनि आमा सामान्य भएको भन्दै काठमाडौं पठाएको थिएन् । तर, अत्यधिक रक्तस्रावले थलिएकी सुत्केरीलाई लापरबाहीपूर्ण तरिकाले अस्पतालमा राखेपछि उनको मृत्यु भएको आफन्तको आरोप छ । बुधबार अस्पताल भर्ना भएकी नुवाकोटको तारकेश्वर गाउँपालिका–५ की ३५ वर्षीया वस्तीले बिहीबार बिहान सामान्य अवस्थामा छोरा जन्माएकी थिइन् । सुत्केरीपछि अत्यधिक रक्तश्रावका कारण बिहीबार नै उनको मृत्यु भएको थियो ।

 

अत्यधिक रक्तश्रावले जोखिममा परेपछि उपचारका लागि हेलिकप्टरमार्फत काठमाडौँको शिक्षण अस्पताल पुर्याउदा मृत्यु भइसकेको उपचारमा संलग्न चिकित्सकले बताएका छन् । नवजात शिशुको पनि श्वासप्रश्वास सन्तुलन नभएकाले शिशुलाई पनि थप उपचारका लागि काठमाडौँ ल्याएको अस्पतालले बताएको छ । बच्चा जन्माउँदा खुलेको पाठेघर बन्द नभई त्रिशूली अस्पतालस्थित

सुत्केरीकक्षभित्र अत्यधिक रक्तश्राव र अर्धचेत हुँदासमेत चिकित्सकले ध्यान नदिँदा उनको मृत्यु भएको गोमाका दाजु भोजप्रसाद न्यौपानेले आरोप लगाएका छन् । सुत्केरी भएपछि चिकित्सकले उनको उपचारमा चासो नदिँदा घटना भएको भन्दै शव जिम्मा नलिने र दोषीमाथि कारवाही हुनपर्ने भन्दै विरोध सुरु भएको हो । अहिले त्यस क्षेत्रमा तनाब थप बढ्दै गइरहेको छ ।