भारतीय मुलकी प्रीति पटेल बनिन् बेलायतको गृहमन्त्री, जोनसोनको मन्त्रिमण्डलमा ३ भारतीय अनुहार

 

बोरिस जोनसनको मन्त्रिमण्डलमा तीन जना भातरीय मुलका बेलायतीले पनि ठाउँमा पाएका छन् । भारतीय मुलकी प्रीति पटेल बोरिस जोनसोन नेतृत्वको मन्त्रिमण्डलमा गृहमन्त्री बनेकी छिन् । भारतीय मुलका ऋषि सुनाक टेजरी मन्त्री बनेका छन् भने आलोक शर्माले बेलायतको अन्तराष्ट्रिय विकास मामिला हेर्ने विदेश मन्त्रीको जिम्मेवारी पाएका छन् ।

 

४७ वर्षीया प्रीति पटेल बे्रग्जिट मुद्दामा पहल गर्ने चर्चित महिला नेतृ मानिन्छिन् । उनि गुजराती मुलकी हुन् । उनले ब्रेग्जिटको मुद्दामा थेरेसा मेले लिएको नीतिबारे चर्को आलोचना गर्छिन् ।

 

यसअघि बेलायतको गृहमन्त्री पाकिस्तानी मुलका साजिद जाविद बनेका थिए । उनलाई अहिले गठन गरिएको मन्त्रीमण्डलमा अर्थ मन्त्रीको जिम्मा दिइएको छ । जोनसोनले मन्त्रिमण्डल गठन गर्दै ब्रेग्जिट मुद्दामा साथ दिएका राजनीतिक सहकर्मीलाई अगाडि ल्याएका छन् ।

 

बेलायतको क्याबिनेटमा ६० वर्षकै सबैभन्दा ठुलो बदलाव
जोनसनले बेलायतको क्याबिनेटमा ६० वर्षकै सबैभन्दा ठुलो बदलाव ल्याएका छन् । उनले ब्रेग्जिट मामिलामा साथ दिनेलाई अगाडि ल्याएका छन् । ११ मन्त्रिलाई उनले बर्खास्त गरेका छन् । ४ मन्त्रिलाई राजीनामा दिन बाध्य पारिएकाे छ भने २ जबरनलाई अवकाश दिइएकाे छ । यस पटकको मन्त्रिमण्डल ३१ सदस्यीय बनाइएको छ । थेरेसा मेको समयमा मन्त्रि संख्या जम्मा २९ थियो ।

थेरेसाले प्रीति पटेललाई कैबिनेटबाट हटाएकी थिइन्
नोभेम्बर २०१७ मा थेरेसाले प्रीति पटेललाई मन्त्रि पदबाट हटाएकी थिइन् । पटेल सो समय बेलायतको मन्त्रिमण्डलभित्र अन्तराष्ट्रिय विकास मामिला हेर्ने मन्त्रि थिइन् । थेरेसाले मन्त्री पदबाट हटाउँदै गर्दा पटेलमाथि इजराइलका अधिकारीहरुलाई बेलायतको आन्तरिक सूचना चुहाएको आरोप लगाएकी थिइन् । त्यस समय बोरिस जोनसोनले क्याबिनेटमा फिर्ता ल्याउन थेरेसालाई अपिल गरेका थिए ।

 

९ वर्ष पहिले सांसद बनेकी थिइन् प्रीति
प्रीति पटेल सन् २०१०मा पहिलो पटक कन्जरभेटिवको तर्फबाट सांसद बनेकी थिइन् । डेबिड कैमरन नेतृत्वको सरकारले उनलाई भारतीय समुदाय सम्बन्धी जिम्मेवारी दिएका थिए । सन् २०१४ मा उनलाई ट्रेजरी मिनिस्टर (राज्य मन्त्री) र २०१५ मा रोजगार मन्त्री बनाइएको थियो । सन् २०१६ मा उनी थेरेसा मेको मन्त्रिमण्डलमा अन्तराष्ट्रिय विकास मामिला हेर्ने विदेश मन्त्री बनेकी थिइन् ।

 

को हुन् ऋषि सुनाक र आलोक शर्मा ?
३८ वर्षका ऋषि सुनाक भारतीय मुलका भए पनि उनको जन्म भने बेलायतमै भएको थियो । उनले अक्सफोर्ड युनिभर्सिटी र स्टैनफोर्ड युनिभर्सिटीबाट अध्ययन पुरा गरेका थिए । उनले २०१५ मा कंजरवेटिव पार्टीबाट टिकट लिएर चुनाव जितेका थिए । ब्रेग्जिट मुद्दामा समर्थक हुनुको कारणले उनि थेरेसा मेको क्याबिनेटमा पनि सामेल भएका थिए ।

 

आलोक शर्मालाई अहिले अन्तराष्ट्रिय विकास मामिला हेर्ने राज्य मन्त्री बनाइएको छ । उनले यसअघि रोजगार मन्त्री र हाउसिंग कम्युनिटीज मन्त्रीको जिम्मेवारी सम्हालिसकेका छन् । सन् २०१० मा पहिलोपटक सांसद बनेका शर्मा बैंकिङ्ग क्षेत्रका व्यक्ति हुन् ।