राैतहटकाे गाैर जलमग्न, पूर्वप्रधानमन्त्री नेपालकाे घर पनि डुब्यो
रौतहट जिल्लामा बाढीले डुबान भएकाे छ । लगातारको झरीपछि बागमती र लालबकैया नदीमा बाढी आएपछि सदरमुकाम गौर जलमग्न भएको हाे ।
सदरमुकाम गौरमा रहेका घरमा पानी पसेपछि स्थानीयहरू उद्धारको पर्खाइमा रहेका छन् ।
सदरमुकाम गौरसहित १८ वटै स्थानीय तह जलमग्न भएका छन् । लालबकैया र बाग्मती खोलाले ठाउँठाउँमा तटबन्ध भत्काएको छ ।
बाढी बस्तीमा झण्डै ५ हजार नागरिक विस्थापित भएका छन् । नागरिक रातभरि भोकभोकै र जाग्राम बसेका छन् । १ तला घर हुनेहरू छिमेकी दुई तले घर भएकाहरुकोमा बसेका छन् ।
पूर्व प्रधानमन्त्री माधवकुमार नेपालको घरसहित सरकारी कार्यालय, कारागार डुबेका छन् । अन्नबाली र पशुचौपाया जोगाउन नसकेका नागरिक आफ्नै ज्यान कसरी जोगाउने भन्ने चिन्तामा छन् ।
पूर्व प्रधानमन्त्री नेपालकाे परिवार भने काठमाडाैंकाे काेटेश्वरमा रहेकाे घरमा बस्दै आएकाे छ ।
ठाउँ–ठाउँमा बाढीको पानीले घेरिएर टापु बनेका ठाउँमा नागरिक फसे पनि सरकारले उद्धारका लागि हेलिकप्टर पठाउन सकेको छैन ।
सीमावर्ती क्षेत्रमा भारतले लालबकैया र बागमतीसँगै जोडिएको ६ किलोमिटर तटबन्ध निर्माण गरेका कारण पानीको बहाव रोकिएको छ । १० फिट पानी जमेको छ ।
