एयरपोर्टको भिडियो काण्ड अख्तियारमा, महाप्रवन्धक राजकुमार क्षेत्रीले मागे दुईवटा गाडी र ५० लाख
अख्तियार आयुक्तको पदमा बहाल रहेकै समय अनियमितता गरेको पुष्टि भएपछि राजनारायण पाठक पदबाट वहिगर्मित हुनुपरेजस्तै काठमाडौं त्रिभुवन अन्तर्राष्ट्रिय विमानस्थलमा भएको छ ।
विमानस्थलमा मिटर ट्याक्सी सञ्चालनको ठेक्का लगाउने विषयमा नागरिक उड्डयन प्राधिकरण, त्रिअवि कार्यालय र ठेकेदारबीच कुरा नमिल्दा अन्ततः मदिराले लठ्ठ भएको अवस्थाको भिडियो, आर्थिक लेनदेन गर्दै गरेको दृश्यसहितको भिज्युवल टंगालस्थित अख्तियार कार्यालय पुगेको छ । ठेकेदारहरुले ठेक्का रोक्काका लागि अन्तरिम आदेशको माग गर्दै रिट दायर गरेपछि सर्वोच्चले अन्तरिम आदेश दिएको र आदेशको अवधीभर अख्तियारले कारवाही स्थगित गरेको स्रोतले जनाएको छ । यसरी ठेकेदारहरुसँग आर्थिक मोलमोलाई गरेको साढे दुई घण्टाको भिडियोका मूलपात्र हुन्, नागरिक उड्डयन प्राधिकण, त्रिअविका महाप्रवन्धक राजकुमार क्षेत्री र निर्देशक हेम दाहाल ।
एयरपोर्टमा विमानस्थल हवाई यात्रु यातायात सेवा व्यवस्था लिमिटेडले सात वर्षदेखि मिटर ट्याक्सी सञ्चालनको ठेक्का पाउँदै आएको थियो । तर, विमानस्थलस्थित नागरिक उड्ड्यन प्राधिकरण कार्यालयले सो ठेक्का रद्द गरी अर्को ठेक्का आह्वान गर्न खोजेपछि ठेकेदार र प्राधिकरण प्रशासनबीच विवाद हुँदै आएको छ । ठेकेदारहरुले ठेक्काको म्याद थपका लागि माग गरेका थिए । तर, महाप्रवन्धक क्षेत्रीले हाल त्यहाँ चलिरहेका सबै पुराना ट्याक्सी हटाई नयाँ खरिद गरिनुपर्ने र प्रतिट्याक्सी डेढदेखि दुई लाख रुपैयाँ आफूलाई कमिशन आउनुपर्ने माग गरे । अहिले त्रिअविमा दुई सयवटा मिटर ट्याक्सी सञ्चालनमा छन् । हाल त्रिअविमा ट्याक्सीको ठेक्का परेको कम्पनीका सञ्चालक विजय स्वाँर, पुरुषोत्तम सिंखडालगायतका छन् ।
महाप्रवन्धक क्षेत्रीले ठेक्काको निरन्तरता वा ठेक्का रद्द गर्न नमानेपछि ठेकेदारहरुले महाप्रवन्धक क्षेत्री र हेम दाहाललाई एक रेष्टुरेष्टमा डिनरका लागि बोलाए । डिनर खाने क्रममा त्यहाँ भएका सबै कुराकानी स्मार्ट भिडियोमार्फत रेकर्ड गरिएको छ । त्यसमा महाप्रवन्धक क्षेत्रीले दुई वटा गाडी र ५० लाख नगद माग गरेको अडियो र भिज्युवल दुबै रेकर्ड छ । उक्त भिडियो ठेकेदार पुरुषोत्तम सिंखडाको मोबाइलमा रेकर्ड गरिएको हो । सोही भिडियोमा तत्कालै केही रकम माग गरिएको र माग गरिएजति रकम नभएका कारण चेक दिइएको दृश्य पनि रेकर्ड भएको छ ।
उक्त भिडियो दृश्य लिएर ठेकेदारहरु भोलिपल्टै अख्तियारमा बहाल रहेका एकजना आयुक्तसँग भेट्न पुगेका थिए । कांग्रेस नेता प्रकाशमान सिंह निकटस्थ ती आयुक्तले भिडियोको एक प्रति आफ्नो साथमा राखेका छन् । तर, तत्कालै अदालतले अन्तरिम आदेश दिई ठेक्कासम्बन्धी कुनै काम अघि नबढाउनु भनेका कारण सो भिडियो हालसम्म गोप्य नै राखिएको छ ।
यो बिषयमा बुझ्न ठेकेदार पुरुषोतम सिंखडालाई हामीले सम्पर्क गर्दा मौखिक कुरा भएको, तर आफूसँग प्रमाण नभएको बताए । अगाडि थपे ‘प्रमाण भएको भए त आफैं अख्तियारमा लगेर उजुरी हाल्दथें ।’ हामीले यो बिषयमा त्यहाँका महाप्रवन्धक राजकुमार क्षेत्रीसँग प्रतिक्रिया लिने प्रयास गर्यौं । तर उनी सम्पर्कमा आउन चाहेनन् ।
