एसइईमा ३.६ जिपिए आएपछि यी दुई किशोरीले गरे आत्महत्या
केही वर्ष पहिले परीक्षामा असफल भएको भन्दै विद्यार्थीहरुले जीवन त्याग गरेका खबर आउँथे । अहिले माध्यामिक शिक्षा परीक्षा एसईईमा ग्रेडिङ प्रणाली लागु गरेको छ । पहिलेको तुलनामा ग्रेडिङ प्रणाली लागु भएपछि यस्ता अप्रिय घटनाहरु खासै सुनिएको थिएन । तर यो बर्ष भने यो अप्रिय घटना दोहोरियो । विद्यार्थीहरुले सोचेअनुसार नतिजा नआएपछि विकल्पमा मृत्युको बाटो नै रोज्न थालेका घटनाहरु बाहिर आइरहेका छन् । यस वर्ष पनि नतिजा सोचे अनुरुप नआएको भन्दै २ किशोरीले जीवन नै त्याग गरेका छन् । जीवन त्याग गर्नेमा अर्घाखाँचीको सन्धिखर्क नगरपालिका वडा नम्बर ७ घर भई काठमाडौं चन्द्रागिरीमा बस्दै आएकी किशोरी सदिक्षा पौडेल रहेकी छिन् । उनले चन्द्रागिरी नगरपालिका १२ बलम्वु दूरसञ्चार नजिकै डोरीमा आफ्नो जीवन त्याग गरिन् । बलम्वु माध्यमिक विद्यालयबाट पौडेलको एसइईमा जिपिए ३.६ आएको थियो ।
यो भनेको सामान्यतया राम्रो नतिजा नै मानिन्छ । उनको शवलाई शिक्षण अस्पतालमा पोस्टमार्टम गर्न पठाइएको प्रहरीले जनाएको छ । उता झापामा समेत अर्की किशोरीले जीवन त्याग गरेको खबर छ । बुद्धशान्ति बुधबारे स्थित वाल्मीकि बोअर्दिन्ङ स्कुलमा अध्ययनरत सलिना ढकालले पनि नतिजालाई लिएर आफुलाई त्याग गरेको बताइएको छ ।
