तत्कालीन कृषिमन्त्री हरि पराजुलीले आजकै दिन गरे यस्तो हर्कत
देशभर रोपाइँको चटारो थियो । दुःख भुलेर कृषकहरू रोपाइँमा जुटेका थिए । घटना २०७२ साल असार १५ गते मंगलवारको हो । असार १५ को अवसर पारेर मन्त्रीदेखि कलाकारसम्म खेतमा धान दिवसको रमाइलोमा जुटेका थिए । कति मन्त्री त हिलो नछोइ फर्किए तर काठमाडौंको मुलपानीमा पुगेका कृषिमन्त्री हरि पराजुलीले भने खेतमै रमिता देखाएका थिए ।
झट्ट हेर्दा उनी मन्त्री हुन् भनेर छुट्याउन निकै गाह्रो पर्थ्यो । तर, उनी थिए तत्कालीन कृषी मन्त्री–हरि पराजुली । उनी राष्ट्रिय धान दिवस मनाउन काठमाडौंको मुलपानी पुगेका थिए । धान दिवसको दिन भएर मन्त्री पराजुली कृषक जस्तो देखिनु कुनै नौलो र आश्चर्यको कुरा थिएन । तर मन्त्री पराजुलीको हर्कतले पो सबैलाई चकित बनाएको थियो ।
हास्दै हिलोमा छिरेका मन्त्रीले एकाएक ताण्डव नै देखाए । सवैलाई लज्जित बनाए । उनले आफ्नो जिउमा लागेको हिलो पुछ्न महिलाकै फरियाको सहायता लिए । रमाइलो गर्ने बहाना मन्त्री जस्तो गरिमामय पदको पदीय मर्यादालाई नै लत्याएर अंगालो नै हाले । ती महिलाले मन्त्रीलाई नगर्नु–नगर्नु भन्दै थिइन् तर, मन्त्री ज्यू भने पुनः उही शैलीमा लम्किरहेका थिए ।
अप्ठयारो महसुस गरेकी ती महिलाले मन्त्रीको असभ्य व्यवहारप्रति धारे हात लाउँदै गाली गर्दै उम्किन सफल भइन् । तर, पनि मन्त्री ज्युले आफूलाई काबुमा राखेनन् । उनको गालीलाई वास्तै नगरी फेरि अर्की महिलासंग गर्ल्याम्म अंगालो हाल्न पुगेका थिए । मन्त्री ज्यूले एकपछि अर्को गर्दै रोपहार अन्य केही महिलासँग पनि यस्तै दुर्व्यहार गरेका थिए । घाटीमा विउको माला, टाउकोमा छत्रे टोपी, सेतो टिर्सट र हाफ पाइन्टमा निकै उत्साहित हुदै रोपाइँ कार्यक्रममा सहभागी भएका मन्त्री पराजुलीले खेतमा पस्नुअघि आशा लाग्दा भाषण नगरेका पनि होइनन् ।
तर बोली र व्यबहार आकास–पातालको अन्तर भएपछि कस्को के लाग्ने ? धान दिवसमा गरेको त्यो हर्कतलाई गल्ती भएको स्वीकार्दै मन्त्री पराजुलीले त्यसको दुई दिनपछि पदबाट राजिनामा दिएका थिए । नेपाली राजनीतिक इतिहासमा यो एक अनौठो घटनाको रुपमा चित्रित छ । आजको दिन यो कुरा नकोट्याइरहन सकिन्न ।
