४ लाख ७५ हजारभन्दा बढी परीक्षार्थी सहभागी एसईईको नतिजा प्रकाशन आज
परिक्षा नियन्त्रण कार्यालयले एसईई परिक्षाको नतिजा आज प्रकाशन गर्नका लागि दिउँसो बोर्ड बैठक डाकेको छ । परीक्षा नियन्त्रक विष्णुप्रसाद अधिकारीका अनुसार बैठकले निर्णय गरेपछि नतिजा सार्वजनिक हुन्छ ।
प्रदेश २ मा प्रश्नपत्र बाहिरिएपछि पुनः परीक्षा लिनु परेको र कर्मचारी समायोजन हुँदा पनि जनशक्ति अभाव भएकाले यस बर्ष नतिजा ढिला आउन लागेको हो ।
२०७५ सालको एसईई परीक्षा गत १० चैत बाट सुरु भएको थियो । परीक्षामा देशभरबाट ४ लाख ७५ हजारभन्दा बढी परीक्षार्थी सहभागी भएका थिए । तीमध्ये दुई लाख ३६ हजार ४४५ छात्र र दुई लाख ३८ हजार ५५८ छात्रा छन् ।
अघिल्लो वर्षको तुलनामा यस पटक केही ढिला नतिजा प्रकाशन हुन लागेको हो । प्रदेश २ मा प्रश्नपत्र बाहिरिएपछि पुनः परीक्षा लिनु परेको र कर्मचारी समायोजन हुँदा पनि जनशक्ति अभाव भएकाले नतिजा ढिला आउन लागेको हो । अघिल्ला वर्षहरुमा जेठ मसान्त वा असार पहिलो साताभित्रै नतिजा सार्वजनिक हुने गर्दथ्यो ।
