नेकपाको सचिवालय बैठक, सबै विवाद मिलाउने तयारी

 

सत्तारुढ नेपाल कम्युनिस्ट पार्टी (नेकपा) को सचिवालय बैठक आज बस्ने भएको छ । आन्तरिक गृहकार्य नपुगेको भन्दै बैठक सारिएको थियो । पार्टी अध्यक्ष एवं प्रधानमन्त्री केपी ओली र दोस्रो अध्यक्ष पुष्पकमल दाहाल ‘प्रचण्ड’बीच पोलिटब्युरो गठन र केन्द्रीय कमिटीको कार्यविभाजनबारे पटक पटक छलफल भइरहेको छ ।

 

अध्यक्षद्वय बीचमा आइतबार पनि छलफल भएको थियो । आज बस्ने सचिलयको बैठकबाट पोलिटब्युरो गठन र केन्द्रीय कार्यसमितिको कार्यविभाजनको विषयमा टुंगो लगाउने विषयमा छलफल भएको थियो ।

 

दुई अध्यक्षको बीचमा छलफल नटुंगिएपछि सोमबार बस्ने भनिएको बैठक स्थगित गरिएको थियो। नेकपाले लामो समयदेखि पोलिटब्यूरो गठन र कार्य बिभाजन गर्न नसकेको भन्दै पार्टी भित्र आलोचना भैरहेको छ ।

 

सोमबार अध्यक्षद्वय बीच भएको छलफमला सचिवालयका सदस्य एवं गृहमन्त्री रामबहादुर थापा र महासचिव विष्णु पौडेल सहभागी थिए। बैठकमा पार्टीको एकता प्रक्रियालाई अन्तिम रूप दिन पोलिटब्युरो गठन, कार्यविभाजन तथा बाँकी रहेका एकता टुंगो लगाउने विषयमा छलफल भएको स्रोतले जनाएको छ । यसअघि जेठ १८ गतेका लागि सचिवालयको बैठक तय गरेको थियो तर अध्यक्षद्वय व्यस्त भएको कारण २० गतेका लागि सारिएको थियो।