संविधानमा प्रेस स्वतन्त्रताको ग्यारेण्टी हामीले गरेका हौं –प्रचण्ड
नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले सबैको साझा उदेश्य भनेको राष्ट्रलाई सुदृण गर्ने गरि अघि बढ्ने हुनु पर्ने बताउनुभएको छ ।
यो संकल्प कुनै विचार मान्यताले कमजोर हुन नहुने प्रचण्डको भनाइ थियो । कृष्णसेन इच्छुक स्मृति दिवसमा पार्टी कार्यालय पेरिसडाँडामा आयोजित कार्यक्रममा प्रचण्डले पत्रकारिता, साहित्य, राजनीति लगायतले राष्ट्रिय एकतालाई बलियो बनाउनु पर्ने बताउनुभयो ।
‘हाम्रो पत्रकारिताले राष्ट्रिय एकतालाई बलियो बनाउनुपर्छ कमजोर होइन’ प्रचण्डले भन्नुभयो,‘ राष्ट्रिय एकतालाई कमजोर पर्ने पत्रकारिता, लेख, रचना, समाचार वा प्रचार छ भने ‘समथिङ इज रङ’ भन्ने हुन्छ, त्यसलाई हामी समर्थन गर्न सक्दैनौं ।’ राष्ट्रिय एकता र भौगोलिक अखण्डता बलियो पार्ने दायित्व पत्रकार, साहित्यकार मानवअधिकारवादी राजनीतिज्ञ लगायत सबैको भएको प्रचण्डको भनाइ थियो ।
सरकारले संसदमा पेश गरेको मिडिया काउन्सिल विधेयक लगायतका विधेयक पास हुने एउटा प्रकृया भएको भन्दै प्रचण्डले समाजमा चलेका बहसबारे केही परिमार्जन गर्नुपर्ने भए त्यो परिमार्जन हुने बताउनुभयो । उहाँले संसदमा छलफल हुने र विधि अनुसार त्यो आउने स्पष्ट पार्नुभयो ।
प्रचण्डले अराजकता स्वतन्त्रता नभएको भन्दै स्वतन्त्रता र अनुशासन एक अर्कासँग असाध्यै घनिष्टतासँग जोडिएको धारणा राख्नुभएको थियो ।
‘संविधानमा प्रेस स्वतन्त्रता बारे जे लेखिएको छ त्यो हामीले लेखेका हौं भन्दै अध्यक्ष प्रचण्डले मौलिक अधिकार हामीले राखेको हो’ सबै ढुक्क हुँदा हुन्छ यी केहीपनि हनन हुँदैनन् । प्रचण्डले भन्नुभयो,‘ त्यसको जिम्मा नेपाली जनाताले दिएको हो, त्यसलाई हामीले पुरा गरेको हौं ।’
संविधानलाई आफूहरुले धर्मशास्त्रको रुपमा नबुझेको प्रचण्डको भनाइ थियो । आवश्यक परेको दिन संविधानलाई संशोधन गर्न सकिने उहाँले बताउनुभयो ।
संविधानले भने भन्दा विपरित भावनामा ऐन कानूनहरु नबनाइने प्रचण्डको भनाइ थियो । ‘यदी बनाउनुपर्ने भयो भने संविधान संशोधन गरेर बनाइन्छ । त्यसको केही आधारहरु छन्’ प्रचण्डको भनाई थियो ।
